Osmeña magtukod og pasilidad para sa mga estudyanteng nag BPO

CEBU, Philippines — Gipahibalo ni Vice Mayor-elect Tomas Osmeña ang iyang plano nga magtukod og work-study facility sa South Road Properties (SRP) alang sa mga kabatan-onang gusto magpadayon og eskwela samtang nagtrabaho sa BPO industry.

Gipadayag ni Osmeña ang maong plano niadtong Hunyo 19, Huwebes, atol sa iyang panagtagbo sa usa ka BPO company, diin iyang gihisgutan ang kahimtang sa mga night shift workers ug ang iyang mga plano sa pagtabang kanila.

Ang work-study program gitumong sa mga batan-ong wala makatapos sa kolehiyo ug nanginahanglan og trabaho, apan gusto pa makakab-ot og degree.

Sumala ni Osmeña, ang pasilidad tukuron sa yutang gireserba unta para sa University of the Philippines sa SRP, apan wala matuman ang kasabutan sa kontrata.

“Ang maong pasilidad motugot sa mga estudyante nga magtrabaho og full-time sa BPO samtang nag-eskwela, ug hatagan sila og kahigayonan nga makatigom ug makatapos sa ilang kurso,” matud ni Osmeña.

Iyang gipasabot nga flexible ang sistema, diin ang mga estudyante pwede mo-stretch sa ilang kurso og dugang tuig aron mas manageable ang ilang oras ug workload.

Gitumong kini nga makapamenos sa pressure nga ilang masinati samtang naggunit sa duha ka responsibilidad, trabaho ug eskwela.

Ang work-study facility usa sa tulo ka mayor nga plano ni Osmeña alang sa BPO workers, kauban ang suporta sa single mothers ug ang pagpatuman sa mas episyenteng transport system.

Ang tanang plano kabahin sa iyang kampanya nga “Mayor of the Night,” nga nagtumong sa paghatag og serbisyo sa mga trabahante nga gabii ang duty. — Shiela Mae H. Agrabio, CNU Intern/IBM (BANAT NEWS)