Idlas nga pusher nadakpan ra gyud
CEBU, Philippines — Natanggong na gyud sulod sa detention cell ang usa ka giingon nga dangog nga drug pusher sa Liloan human kini nadakpan sa mga sakop Station Drug Enforcement Unit (SDEU) sa Liloan Police Station sa gilusad nilang buy bust operation diha sa Sitio San Antonio sa Barangay Jubay sa Lungsod sa Liloan sa miaging Sabado sa hapon Hunyo 21, 2025.
Si Police Major Mawi Arcilla, hepe sa Liloan Police Station ang miila sa maong dinakpan nga mao si alyas Chow, 38 anyos nga nagpuyo sa maong dapit.
Sumala pa sa kapolisan, makadaghan na nila kining gi-test buy apan idlas kaayo kay daling kini makamatikod nga polis ang iyang kasabot.
Dili kini magpasaya-saya ug kanunay nga diskumpiyado sa namalit og drugas.
Apan nianang higayona, sa dihang giusban nila kini og palit og drugas wala na gyud makaugpo kay nakuptan kini dayun sa SDEU.
Nakuh nila gikan sa suspek ang 15 gramo nga gituohang shabu nga nagkantidad og P102,000.00 base usab sa Standard Drug Price value niini.
Samtang laing gipasalingang pusher gihapon sa Liloan nga si si alyas Ondo, 37 anyos, ang nadakpan sa buwag nga operasyon diha sa Purok Petchay sa Sitio Tiwason, Barangay Catarman sa maong lungsod.
Ang maong dinakpan nakuhaan og shabu nga nagkantidad og P6,800. —/IBM (BANAT NEWS)
- Latest
