‘Walang Gutom 2027’ gisuportahan sa 102 ka retailers

CEBU, Philippines — Malampusong nakig-alayon ang Department of Social Welfare and Development (DSWD) Field Office 7-Central Visayas sa 102 ka accredited retailers sa Sugbo ug Negros Oriental aron suportahan ang kampanya niini batok sa kagutom pinaagi sa Walang Gutom 2027: Food Stamp Program.

Sa maong gidaghanon, 40 ang naa sa Cebu, samtang 62 ang sa Negros Oriental.

Kini nga mga retailer nag-alagad sa mga benepisyaryo sa Walang Gutom Program sa duha ka probinsya, nga nagtabang sa pagsiguro sa access sa masustansya nga pagkaon alang sa mga kabus nga mga pamilya.

Usa sa nag-unang nagduso sa kalambuan mao ang Enhanced Partnership Against Hunger and Poverty (EPAHP) Program, nga nagtumong sa pagdugtong sa mga community-based organizations (CBOs) ngadto sa mga institusyonal nga merkado.

Pinaagi sa lig-on nga kolaborasyon tali sa EPAHP ug Walang Gutom Program, mikabat sa 20 ka CBOs ang aktibong misalmot sa programa nga gilangkuban sa mga lokal nga mag-uuma ug prodyuser, nga direktang nagsuplay sa mga pagkaon ngadto sa mga benepisyaryo.

Aron mapalapad pa ang abot sa programa, ang Regional Program Management Office (RPMO) sa Walang Gutom Program mopahigayon sa dili madugay og dugang retail market assessments sa Sugbo ug Negros Oriental.

Ang interesadong mga aplikante, retailer man o mga community-based organization mahimong makig coordinate sa ilang tagsa-tagsa ka Local Social Welfare and Development Offices (LSVWDOs) alang sa mga pangutana ug mga pamaagi sa aplikasyon.

Ang departamento, mahimong mo-terminate sa kontrata sa mga partner retailer nga mapakyas sa pagtuman sa mga kondisyon sa programa sama sa paghatag og taas nga kalidad, luwas, ug barato nga pagkaon ug non- food items ngadto sa mga benepisyaryo.

Hangtud Mayo 2025, ang field office naka-verify na sa kinatibuk-ang 32,445 ka benepisyaryo sa duha ka probinsiya, diin 13,619 ang sa Cebu ug 18,826 sa Negros Oriental.

Kini ang mga pamilyang Pilipino nga nikita og P8,739 o ubos pa matag buwan, nga dili apil sa Pantawid Pamilyang Pilipino Program (4Ps).

Sa pagkakaron, 73 ka local government units (LGUs) ang nagpatuman sa Walang Gutom Program, nga gilangkuban sa 48 ka LGU sa Cebu ug 25 sa Negros Oriental.