Nag-stunt sa highway gipatawag sa LTO

CEBU, Philippines — Usa ka babayeng rider ang giimbestigahan karon sa Land Transportation Office (LTO) Region 7 ug gipadad-an og Show Cause Order tungod sa matud pa ‘stunts’ nga gihimo niini samtang nagmaneho sa iyang motorsiklo diha sa highway sa Dakbayan sa Mandaue nga nag-viral sa social media.

Ang maong motorsiklo gikatahong narehistro sa pangalan sa usa ka Debbie Marie Amores Juit. Gihulagway sa LTO nga peligro kaayo para maong babaye ug ingon man sa ubang motorista ang iyang gibuhat niadtong Hunyo 12, 2025 nga nakuhaan og video ug nag-viral sa social media ug miani og mga pagsaway gikan sa mga netizens tungod sa peligro makamugna og aksidente.

Makita sa video nga samtang nagdagan ang motor iyang gibuhian ang manobela, nagbinabaye og lingkod ug nagsayaw-sayaw.

Si LTO Region 7 Director Glen G. Galario pagkadawat sa report mipagawas dayon og SCO niadtong Hunyo 13, 2025 ug gimandoan ang tagiya sa maong motor pagpatim-aw sa ilang buhatan sa LTO 7 Operations Division at N. Bacalso Avenue, Cebu City.

Gimandoan siya pagdala og suwat ug iesplikar sa iyang habig nganong dili siya pwedeng pahamtangan og silot tungod sa paglapas sa Section 48 sa Republic Act 4136, o "Reckless Driving" provision. "This incident represents a clear violation of traffic laws and a serious threat to public safety. The rider endangered not only herself but also other motorists on the road through her reckless behavior," matud pang Gallardo.Gikan sa The Freeman, IBM BANAT NEWS