Mga police outpost gitangtang sa CCPO

CEBU, Philippines — Isip pagtuman sa direktiba sa bag-ong Chief PNP, Police General Nicolas Torre III gikuha sa Cebu City Police Office(CCPO) ang mga elevated outpost nga gipang montar sa nagkadaiyang dapit sa Siyudad sa Sugbo.

Hinoon, giklaro ni CCPO Acting City Director Police Colonel Enrico Figueroa nga ang mga PNP personnel nga na-assign sa mga dapit kun asa gibutang ang outpost magpabilin.

Sigon ni Colonel Figuero tawgon sila og fix visibility post diin kun unsa ang ilahang area of responsibility adto gihapon sila mo-concentrate.

"Magfo-focus sila doon whenever na magkakaroon tayo ng police response or may mga hihingi ng assistance sila parin ang reresponde", pasabot ni Colonel Figueroa.

Nagkanayon si Colonel Figueroa nga ang nausab lang niini mao ang mga elevated outpost gibalhin sa mga tunghaan ug gihimong police assistance desk sanglit moabli na ang klase sunod semana.

Naa gihapo'y mga police nga naka-duty aron malikayan nga dunay mopahimulos nga mga criminal sa mga tinun-an.

"Sa ngayon transition pa tayo, dinahandahan natin yung pag-relocate ng ating mga outpost, pina-identify natin yung mga pupwedeng paglipatan, gagawin natin siyang police assistance desk, sa school muna yung ating concentration", suma pa ni Colonel Figueroa.

Sa pagbukas sa klase alerto ang kapolisan sa siyudad aron masiguro nga kini hapsay ug malinawon ug malikayan ang mga dili maayong panghitabo. (BANAT NEWS)