Roro Port Food Plaza sa Cordova gibuksan na

CEBU, Philippines — Opisyal nga gibuksan ni Cordova Mayor Cesar “Didoy” Suan niadtong Hunyo 7, 2025 ang Roro Port Food Plaza, usa ka bag-ong destinasyon sa pagkaon nga nagtanyag og hayahay nga kasinatian diha sa baybayon alang sa mga Cordovahanon ug mga bisitang Sugboanon.

Ang plaza nga nahimutang sa Roro Port naghanyag sa lain-laing mga lokal nga pagkaon ug gilantaw isip usa ka dakong lakang sa pagpalig-on sa turismo sa lungsod samtang nagsuporta sa gagmay’ng negosyo.

Sa iyang pakigpulong, gihimug-atan ni Suan ang ka mahinungdanon sa pagmentinar sa kalimpiyo ug sa pagsunod sa mga lagda sa kalikupan, ug iyang gi-awhag ang mga tindero nga motabang sa pagpanalipod sa kalikupan ug sa kahapsay sa maong lugar.

“Dili lang kini usa ka lugar para mokaon—usa kini ka lakang aron himuong prime destination ang Cordova”, padayag ni Suan.

Iyang giklaro nga ang mga tindero tugotang mag-operate sa food plaza sulod sa minimum nga unom (6) ka bulan ug posible pa kini nga malugwayan hangtud sa duha ka tuig depende sa mga kalamboan diha sa maong lugar.

Ang dalan paingon sa Roro terminal giandam na karon aron modawat og international cruise ships, usa ka dakong proyekto nga gilaoman nga makadani og mas daghang turista sa lungsod ug sa tibuok probinsiya.

Sa usa ka kalihokan nga gihangop sa komunidad sa mga tindero gipahibalo ni Suan nga libre ang pagkuha og business permits alang sa tanang food vendors nga nag-operate sa maong port.  Gilaoman nga ang Cordova Roro Port Food Plaza mahimong culinary nga sentro ug makapahimuot nga atraksiyon diin ang mga lokal ug turista makatilaw og lamian nga pagkaon samtang nagtan-aw sa katahom sa dagat. —/BDB (BANAT NEWS)