Dugang gamit paghimo og paltik gitahan

CEBU, Philippines — Dugang mga gamit ug ekipo paghimo og mga ilegal nga armas ang gitugyan sa mga  opisyales sa Barangay Masaba, dakbayan sa Danao agi og pagsanong sa panawagan sa Police Regional Office-7 nga patabangon sila sa pagpangita ug pag-ila sa ilang mga konstituwenteng ilegal nga tighimo og mga paltik.

Ang nagkalain-laing mga ekipo ug kahimanan gi-surrender sa mga opisyales ngadto sa 701st Maneuver Company, Regional Mobile Force Battalion (RMFB)-7.

Gihimo ang maong operasyon pinaagi sa hugot nga koordinasyon sa Danao City Police Station Cebu Police Provincial Office (CPPO).

Ang pag-surrender sa mga ekipo nahitabo niadtong Mayo 30, 2025. Ang gipakusgang kampanya gimando sa kapolisan tungod kay mao kini ang gigamit sa mga kriminal sa paghimo og mga krimen.

Gani dunay pipila ini ang napadulong sa mga kamot mga terorista gikan sa Indonesia nga maayo nalang naaresto sa mga otoridad didto sa Mindanao. Matud pa sa kapolisan, ang mga ekipo ug kahimanan paghimo og mga ilegal nga armas boluntaryo nga gi-surrender sa concerned individual ug ang barangay officials na maoy mitahan niini ngadto sa kapolisan.

Ang mga ekipo duha ka bench drill presses,  13 ka bench vises, 15 ka hacksaws, 82 ka steel files ug upat ka gun pattern/frames.

Sa pamahayag ni PRO-7 Regional Director Police Brigadier General Redrico Maranan gihimug-atan niini ang impact sa maong operasyon.

"Each piece of equipment turned over represents a life potentially saved from gun violence. The relentless efforts of our personnel to root out sources of illegal firearms reflect our unwavering commitment to maintaining peace and security in Central Visayas. Our goal remains clear — zero gun-related crimes in the region," sigon ni Maranan.

Subing giawhag sa otoridad ang mga indibidwal nga naghupot og illegal firearms o ekipo nga boluntaryong kining i-surrender ug makig-kooperar sa mga tinugyanan sa balaod.

Gipasalig sa otoridad sa publiko ang paras ug legal handling sa surrendered items. — /IBM (BANAT NEWS)