Upat ka bata gibugaw sa inahan

CEBU, Philippines — Upat ka mga bata nga matud pa biktima sa online sexual abuse sa usa sa mga barangay sa Dakbayan sa Naga niadtong Huwebes sa buntag, Mayo 29, 2025. Ang suspek, ilaha rang inahan nga maoy nagbugaw kanila ngadto sa mga langyaw.

Ang pag-rescue gihimo sa mga sakop sa WCPC-Field Unit, Naga City Police Station Cebu Police Provincial Office, Regional Anti Cybercrime Unit-7, Department of Social Welfare and Development Field Office-7 ug ubang ahensiya sa gobiyerno.

Ang mga na-rescue nag-edad og 14, 15 ug 6 anyos nga pulos babaye ug usa ka 15 anyos nga lalake.

Samtang nadakpan ang suspect nga usa ka 33 anyos nga bababye, inahan sa mga biktima nga matud pa maoy miunay og baligya sa iyang mga anak online.

Ang mga otoridad ni-implementar sa Warrant to Search, Seize and Examine Computer Data gikan ni Benison M. Mahawa, acting Presiding Judge, Regional Trial Court 7, Branch 65, Talisay City tungod sa paglapas sa Section 4(b) sa Republic Act 11930 kun Anti-Online Sexual Abuse or Exploitation of Children (OSAEC) Act.

Nakompiskar sa kapulisan ang usa ka Samsung mobile phone color black nga dunay jelly case, usa ka unit sa Techno mobile phone color black, usa ka unit sa Iphone color rose gold nga dunay jelly case ug usa ka unit sa Iphone color silver nga dunay jelly case.

Nasayran ang opisina sa WCPC-Visayas Field Unit nakadawat og impormasyon gikan sa foreign law enforcement labot sa giingong law-ay nga binuhatan sa suspek gamit ang mga bata ug ilaha kining gi-validate ug kini maoy rason nga naka-apply sila og warrant.

Nagtingkagol karon sa prisuhan ang suspetsado ug ang mga bata gidala sa DSWD.

Sa laing bahin, ang kapolisan sa lungsod sa Minglanilla mipasidaan sa mga ginikanan nga hipuson o dili na pagawson ang ilang mga anak sa lawom nga kagabhion subay sa gipatumang curfew batok sa mga menor de edad.

Si Police Major Arieza Otida, hepe sa kapolisan sa lungsod naglaraw nga ang mga ginikanan maoy ilang pasakaan og reklamo o ba kaha sila ang ipaubos sa intervention program.

Si Otida uban sa 19 ka mga kapitan sa Minglanilla nagtinabangay alang sa pagpatuman sa curfew. Niabot sa 110 ka mga menor de edad ang ilang na-rescue sa ilang dungan nga pagpatuman sa ordinansa sa lungsod alang sa proteksyon sa mga kabataan nga dili mabiktima sa krimen.

Samtang gipahimangnoan sab ni Otida ang nanag-iya og establisamento nga dili na pasudlon ang menor de edad sa oras sa curfew. Kung sila mosupak niini mahimo sila nga masuspenso o ba kaha pasirad-an ang ilang negosyo.  IBM BANAT NEWS