Liog sa ginang gigulgol sa bana

CEBU, Philippines — Usa ka ginang ang nalandig sa tambalanan human gisuwayan og gulgol ang iyang liog sa iyang bana, apan swerte nga habol ang kutsilyo nga gigamit. Nahitabo kini nidtong Biyernes sa hapon sa Sitio Angot, B. Aranas, Barangay San Nicolas Proper ning Dakbayan sa Sugbo.

Si Kapitan Clifford Jude Niñal, sa Barangay San Nicolas Proper nagkanayon nitubag sa alarma ang iyang mga tanod  bahin sa nahitabo.

Nakuptan ra dayun ang suspek samtang gidala sa tambalanan ang biktima nga samdan.

Gitug-an ni Niñal, base sa iyang pakighinabi sa iyang tanod ang managtiayon taga Siquijor ang magtiayon ug nianhi sa dakbayan sa Sugbo aron patambalan ang suspetsado kay duna kini nervous breakdown.

Base sa kasayuran ni Niñal nga nakuha, ang maong bana nisuway og  layat sa bintana nga gabitbit sa ilang anak, maayo nalang nga kini nabantayan.

Si Niñal nitug-an nga ang suspetsado nga gikustodiya na sa kapolisan patambalan usab kay nasamad iyang kamot.  IBM BANAT NEWS