Mga mayor misaad pag-institutionalize sa sugbo maisan

CEBU, Philippines — Misaad ang mga mayor sa Probinsya sa Sugbo nga i-institutionalize ang Sugbo Maisan nga programa sa Probinsya ngadto sa ilang mga lugar.

Kini pinaagi sa pagpasar og mga ordinansa ug pag-umol og organisasyon nga makahangyo og diskwento sa mga institutional buyers.

Atol sa tigom uban ni Gobernador Gwendolyn Garcia gipadayag sa mga mayor ang ilang pagsuporta sa maong programa nga ilang nakita nga makabenepisyo sa mga mag-uuma.

Lakip sa mitambong sa tigum mao sila si Tudela Mayor Jojo Solante, San Francisco Mayor Al Arquillano, Pilar Mayor Winky Santiago, ug Poro Mayor Gary Rama; uban sila Bogo City Mayor Carlo Martinez ug San Remigio Mayor-elect Mariano Martinez niadtong Mayo 28.

Nitambong usab si Argao Mayor Allan Sesaldo ug Department of Agriculture Executive Director Angel Enriquez.

Ang Sugbo Maisan usa ka programa nga nag tinguha nga mapalambo ang produksyon sa mais sa lalawigan ug pagsiguro nga masustiner kini pinaagi sa inter-LGU collaboration, lakip na ang paghatag sa mga mag-uuma og binhi, fertilizers ug technical support.

Nasayran naimplementar na ang maong programa sa lungsod sa Medellin aron matabangan ang mga mag-uuma sa tubo (sugarcane) nga magtransisyon ilabina nga ang sugar mills didto sa maong lungsod mihunong na og operate.

Si Garcia gusto nga mapalapdan ang maong programa ngadto sa ubang lungsod sa lalawigan. (BANAT NEWS)