Baricuatro mopadayon sa tag p20 matag kilo nga bugas

CEBU, Philippines — Ipadayon ni Governor-elect Pam Baricuatro ang pagpamaligya sa P20 matag kilo sa bugas sa iyang paglingkod isip gobernadora sa Probinsiya sa Sugbo.

Giklaro ni Baricuatro nga suportahan niya ang maong programa apan mag-agad kini kun dunay igong gahin.

Sumala pa ni Baricuatro, ang pagpamaligya sa maong bugas wala na unyay pilion tungod kay si bisan kinsa man ang makapalit na unya niini.

Human sa iyang pagpanumpa kagahapon gipadayag niini nga iyahang ipasubay kung unsaon pagsustiner sa maong programa ug makaya ba kun molungtad kini og dugay.

Andam si Baricuatro nga mangita og pamaagi aron mapadayon ang maong programa ug malaumon usab siya nga aduna pay budget sa iyang paglingkod sa Probinsya sa Sugbo.

Kahinumduman gisugdan na ang programang tag P20 matag kilo sa bugas sa probinsya sa Sugbo niadtong Mayo 1 ug nahunong niadtong Mayo 2 tungod sa election ban ug subling gipamaligya sa kalungsuran human sa election.

Samtang si Cebu City mayor-elect Nestor Archival, ang nitug-an nga sa iyang paglingkud usa kini sa iyang pangitaan og paagi nga makabaligya usab sa tag 20 pesos nga kilo sa bugas sa mga molupyo sa dakbayan sa Sugbo.

Karong semanaha si Archival makigtagbo sa Department of Agriculture sa rehiyon siete ug uban pa nga ahensya alang sa proseso sa maong programa. (BANAT NEWS)