Paghatag sa cash grants alang sa 4Ps magsugod sa Hunyo
CEBU, Philippines — Gipahibalo sa Pantawid Pamilyang Pilipino Program (4Ps) sa Department of Social Welfare and Development (DSWD) nga ang pagmonitor sa education compliance ug paghatag sa mga cash grants alang sa School Year 2025-2026 magsugod sa Hunyo.
Matud ni Director Gemma Gabuya sa 4Ps National Program Management Office (NPMO), kini nga adjustment subay sa giusab nga school calendar sa Department of Education (DepEd) para sa School Year 2025-2026.
Ang maong lakang subay usab sa 4Ps Act of 2019, nga nagmando nga ang education grants dili molapas sa 10 ka bulan matag gimonitor nga bata sa usa ka tuig.
Si Gabuya miingon usab nga ang compliance period maglakip sa Pay Period 3 (P3), nga magsugod sa Hunyo hangtud Hulyo 2025.
Aron makadawat sa education grants ubos sa 4Ps, kinahanglang siguruhon sa mga benepisyaryo nga ang mga bata nga nag-edad og 3 ngadto sa 18 anyos ma-enrol sa eskwelahan ug magmintinar sa class attendance rate nga labing menos 85 porsyento.
“This change ensures that education grants are disbursed only during months when children are actually attending school, thereby maximizing the support provided to beneficiary households,” suma ni Gabuya.
Gianunsyo usab sa 4Ps NPMO nga para sa Pay Period 2 (P2), nga naglangkob sa Abril hangtud Mayo 2025, ang mga benepisyaryo makadawat lang og health grants, rice subsidies, ug ang First 1000 Days (F1KD) cash grants alang sa mga panimalay nga adunay mabdos nga mga miyembro o mga bata nga nag-edad og 0 ngadto sa 2 anyos. (BANAT NEWS)
- Latest
