Makalapas sa lagda sa trapiko ipaubos sa seminar sa Talisay

CEBU, Philippines — Ang City of Talisay-Traffic Operation Development and Authority (CT-TODA) mo hingusog sa pag-gukod sa mga motorista nga makalapas sa lagda sa trapiko bisan og ginagmay lang ang mahimong kalapasan.

Si Jonathan Tumulak, pangulo sa CT-TODA nagkanayon nga ang ilang pagpatuman sa estrikto nga lagda sa karsada nagsubay sa pagtimaan sa Road Safety Month.

Matud ni Tumulak nga kinahanglan sa mga drayber nga mag-amping sa pagmaneho sa sakyanan o motorsiklo.

Si Tumulak nagkanayon nga kadtong malambigit sa disgrasya ang ipaubos nila sa seminar bisan pa og nahusay ra ang matag habig.

Sa ilang seminar nga ipahigayon ang mga motorista tudloan sa kurtisiya diha sa karsada  diin sa maong paagi mogahin sila og oras sa pagpaminaw aron magmatngon na sila sa pagmaneho.

Gikataho nga ang command center sa CT-TODA daghan og nasaksihan nga panghitabo sa karsada dagko man o gagmay nga panghitabo.

Sa laing bahin, gibutyag ni Tumulak nga hisgotan sa umaabot nga mga adlaw sa Association of Barangay Council (ABC) sa Dakbayan sa Talisay ang regulasyon sa e-bike.

Matud ni Tumulak nga panahon na gyud nga mapatuman ang ordinansa sa pag-regulate sa mga e-bike.

Kini gumikan sa padayon nga pagsaka sa gidaghanon niini nga nakatampo sa hinay nga dagan sa trapiko sa siyudad.

Tukion sa mga kapitan atol sa ilang session ang regulasyon sa e-bike diin ilakip niini ang pletehan, menor de edad nga magmaneho ug uban pa nga angay usbon sa paggamit sa e-bike.

Ug kong mahuman na sa pagtuki sa ABC aduna na unyay abogado nga mosuroy sa kabarangayan aron maestorya ang mga drayber sa e-bike.

Tumong niini mao ang dugang pagpasabot labot sa pag-regulate kanila diha sa kadalanan. (BANAT NEWS)