Garcia mohangyo nga ipadayon ang sersbisyo sa mga empleyado

CEBU, Philippines — Hangyuon ni Cebu City outgoing-mayor Raymond Alvin Garcia si mayor-elect Nestor Archival nga ipapadayon sa pagpanerbisyo ang mga kasamtangang empleyado sa kagamhanan sa mosunod nga administrasyon.

Sayo pa, nipahibalo si Archival nga ipaubos og streamlining ang tanang empleyado sa city hall diin susihon ang kapabilidad sa mga empleyado ubos sa iyang pagdumala aron nga mas epektibo ang mga serbisyo ug operasyon sa kagamhanan sa siyudad.

Matud ni Garcia nga daghan pa nga nagpabiling empleyado sa city hall nga maayo, kamao ug aduna nay igo nga kasinatian sa ilang mga trabaho.

Gipasabot ni Garcia nga lisod usab og mag-hire og mga bag-ong empleyado tungod kay kinahanglan nga mokat-on na usab kini sugod sa sinugdanan.

Sa iyang bahin,  si Archival nagkanayon nga walay dinalian nga kausaban ubos sa iyang administrasyon ug plano usab niya nga ipaubos una og status quo ang mga empleyado sulod sa tulo ka buwan tungod kay sutaon pa niya ang panudlanan sa siyudad kong igo ba nga makasweldo sa mga empleyado.

Gikataho nga kasamatangang adunay kapin sa 7,000 ka empleyado ang city hall  diin gilangkuban kini sa gibana-banang 2,000 ka regular, 3,000 ka casual ug 2,000 ka job order.

Sutaon usab ni Archival ang nikatap ang taho nga adunay mga JO nga wala pa makadawat sa ilang sweldo.

Matud ni Archival nga nakadawat na siya sa reklamo kabahin niini ug susihon niya ang job descriptions sa mga tawo nga anaa sa city hall kong angayan ba usab kini nga papadayonon.

Dugang pa ni Archival nga ang iyang team mosuta sa kong unsa nga mga trabaho ang mahinungdanon kong aduna bay budget aron suportahan ang mga trabahante ug kong ang matag empleyado nagsilbi ba usab kini sa maayong katuyoan.

Gikatakda nga mag-abot si Garcia ug Archival sa sunod duha ka semana aron matuki ang mahitabong transisyon sa administrasyon. (BANAT NEWS)