Archival ug Garcia magtagbo, transisyon sa pamunoan hisgotan
CEBU, Philippines — Magtagbo karong adlawa (Lunes) si Cebu City Mayor-elect Nestor Archival ug si outgoing Mayor Raymond Alvin Garcia sa Cebu City Hall aron hisgutan ang transition sa administrasyon.
Gitug-an ni Archival nga human sa piniliay wala pa gyud sila magkahimamat ni Garcia, nga kaniadto iyang kauban sa konseho sa dakbayan panahon nga si Garcia pa ang vice mayor ug Presiding Officer.
Para niya, angay nga magkaatubangay sila aron mas pormal nga sabotan ang giya alang sa transition, uban ang pakigtagbo sa transition team ni Garcia ug sa iyang kaugalingong team.
Gitudlo ni Garcia si City Administrator Atty. Kristine Joyce Batucan aron mamuno sa iyang transition team. Si Archival sab mipahibaw nga iyang ipadayag sulod ning semanaha kung kinsa ang mga sakop sa iyang team.
Sa bahin sa mga empleyado sa City Hall, mitug-an si Archival nga wala pay klaro kung adunay mga reassignment nga mahitabo human siya molingkod sa pwesto. Sa pagkakaron, iyang giingon nga status quo lang usa.
Apil kini sa ilang hisgutan sa transition team. Gikatakda sab siyang makigkita sa Human Resource Development Office (HRDO) aron tan-awon ang datos sa matag empleyado. Gisusi sab niya kung igo ba ang pundo aron mapadayon ang kasamtangang gidaghanon sa mga empleyado.
Una niini gitug-an sa pangu sa HRDO nga ang kadaghanan sa mga casual nga empleyado mahuman ang ilang kontrata sa Hunyo 30, sakto sa pagsugod sa bag-ong administrasyon.
Si Garcia sa iyang bahin naglaum nga ipadayon ni Archival ang mga plano sa iyang administrasyon.
Gipasalig usab ni Archival nga suportahan nila ang mga proyekto nga nasugdan sa kasamtangang administrasyon.
Sa mga umaabot nga adlaw hangtod sa iyang pormal nga pagsugod sa serbisyo, mas mopakita pa gyud siya sa City Hall aron tan-awon ang dagan sa transition ug makuha ang tanang inputs para sa iyang pagdumala.
Sa pagkakaron, aduna na sab siyay mga pangalan nga giandam para sa posisyon sa City Administrator ug Legal Officer sa dakbayan. Apan iyang giingon nga i finalize pa kini sa iyang team. — /MEL (BANAT NEWS)
- Latest
