“Sleepless Cebu City Hall” usa ka programa nga ipatuman sa siyudad

CEBU, Philippines — Usa sa mga prayoridad nga programa nga gitakdang ipatuman sa bag-ong administrasyon sa siyudad mao ang “Sleepless Cebu City Hall”, usa ka programa nga nagtugot sa mga trabahante nga maka-proseso sa ilang mga dokumento panahon sa gabii.

Kini matud pa ni Cebu City Mayor-elect Nestor Archival atol sa usa ka pakighinabi kagahapon, Domingo, Mayo 18, 2025.

Sumala ni Archival, nahimong ideya ang maong programa human sa ilang pagtuki nga daghang mga empleyado ang walay igong panahon sa adlaw aron makaproseso sa ilang mga dokumento. Dugang pa niya, ang uban sa mga trabahante napugos pa sa pagkuha og leave sa ilang trabaho.

Gipadayag ni Archival nga ang konsepto gisugyot sa iyang runningmate, si Vice Mayor-elect Tomas Osmeña, ug usa kini nga iyang gisuportahan pag-ayo.

"Kani nigawas ni (nga concept) because daghan man gud nga concerns sa atong mga tawo gikan sa BPO (Business Process Outsourcing)," matud pa ni Archival.

Gipasabot pa ni Archival nga kini nga mga isyu gikan sa mga empleyado sa BPO, nga anaa sa mga 200,000 ka buok, ug gipasabot niya nga sila naghatag og dakong kontribusyon sa ekonomiya sa siyudad nga kapin sa 50 porsyento.

Gidugang pa niya nga ang maong porsyento mahulog nga maabot og bilyones nga mga pamuhunan nga gi-invest sa BPO sector.

Gidugang pa niya nga sa taas nga panahon, kung masulayan na ang programa ug mahan-ay ang mga adjustment, mahimo na nila kining isugyot sa mga nasyonal nga ahensya aron kopyahon ang konsepto nga kabahin sa ilang long-term nga tumong.

Giklaro ni Archival nga ang Sleepless City Hall dili lang limitado sa partikular nga oras, kondili mag-operate kini 24 oras kada adlaw.

"Sleepless ba, meaning, walay hunong, this is main concept," matud pa ni Archival.

Gidugang pa niya nga posibleng sugdan ang implementasyon sa una niyang adlaw sa buhatan karong Hulyo 1, 2025, ug ang mga estudyante makabenepisyo usab sa maong konsepto.

Si Vice Mayor-elect Osmeña usab nag-post sa iyang opisyal nga Facebook page nga siya ug si Archival nakigkita na sa mga lider sa industriya sa BPO. Ang maong miting nagtuki sa implementasyon sa luwas nga pampublikong transportasyon ug kasiguraduhang trabaho alang sa mga bag-ong graduate.

Gituohan usab nga ang maong miting nagtumong sa paghimo og mga schedule nga angay sa mga working student nga ilang gitawag nga “one-stop shop in IT Park.”

Gipadayag pa niya nga ang ilang administrasyon mangita og mga pamaagi aron mapalambo ang progresibo ug sayon nga kinabuhi para sa tanan. — /MEL (BANAT NEWS)