Duha ka himuanan og paltik sa Danao gironda

CEBU, Philippines — Gironda sa Danao City Police Station Cebu Police Provincial Office ang duha ka tighimo matud pa og ilegal nga mga armas sa mananglahi sa Barangay sa Danao City niadtong Mayo 16 ug 17, 2025.

Niadtong Mayo 16, 2025, Biyernes,  ang Danao City Police Station nakadawat og impormasyon mahitungod sa buhatan og mga paltik diha sa Purok 5, Barangay Masaba, Danao City.

Gironda kini sa kapulisan ug sa ilang pag-abot lugar naaktuhan ang suspetsado nga si alyas Ran, 46 anyos naghimo og illegal nga armas.

Ang suspetsado usa ka construction worker apan kahibawo kini mobuhat matud pa og armas.

Nasakmit sa kapulisan ang pipila ka mga wala pa mahuman nga armas, pistol barrels, bala, magazines ug mga ekipo paghimo og armas sama lathe machine, grinder, welding machine ug ubang metal working tools.

Ang suspetsado naa na sa kustodiya sa Danao City Police Station.

Samtang niadtong Mayo 17, Sabado laing pagpangronda ang gihimo kapulisan sa Danao City Police Station diha sa Sitio Patag, Barangay Manlayag basi impormasyong dunay tighimo og armas sa lugar.

Apan nakaikyas nang daan ang tighimo niini sa pagabot sa mga polis.

Nasakmit hinoon ang wala pa mahuman nga usa ka rifle, .22 caliber revolver, mga bala, magazines, ug mga ekipo paghimo og armas.

Si Police Captain Blane Dunn Tabares, Public Information Officer sa Cebu Police Provincial Office miingon nga posible ang duha ka mga gironda nga illegal manufacturer og armas managkauban ra.

Si CPPO acting Provincial Director Police Colonel Jovito Atanacio miingon ang maong malampuson nga operasyon kabahin sa ilang kampanya pagpuhag aning mga ilegal nga armas nga nakatampo sa pagkuyanap aning mga loose firearms nga posibleng gamiton sa mga krimen.

"The discovery of these manufacturing sites is a clear message that we will not tolerate the spread of unlicensed firearms in the province. We will continue to intensify our intelligence efforts and law enforcement actions to ensure a safer and more secure Cebu Province," sigon ni Atanacio. Ang suspetsado pasakaan og kasong kalapasan sa Republic Act 10591 kun Comprehensive Firearms and Ammunition Regulation Act. — /IBM (BANAT NEWS)