Nalataya'g trak

CEBU, Philippines — Patay diha-diha dayon ang usa ka motorista human kini nalatayan og truck nga nagkarga og graba diha sa Barangay Tungha-an lungsod sa Minglanilla niadtong Sabado sa gabii.

Ang nirespondeng polis nakakuha og ID diha sa motorsiklo sa namatay nga adunay pangalan nga alyas Glemar nga usa ka warehouse assistant sa usa ka dakong kompaniya sa Dakbayan sa Mandaue.

Samtang ang drayber sa truck nailhan nga si Eric Flores, 38 anyos nga taga Purok Mahogany, sitio AA, Barangay Jaclupan sa Syudad sa Talisay.

Ang drayber sa truck miingon nga padung unta sila mangaon kuyog sa iyang asawa apan nakurat siya kay adunay mibuto sa ilang atubangan .

Sa dihang iyang gisusi nakita niya ang motorista nga napasok sa ilawom sa truck.

Ang drayber nipadayag nga dili kaayo kusog ang iyang padagan tungod kay naa man siyay karga nga graba.

Pipila ka tawo nga nakakita sa sitwasyon niingon nga na slide ang motorista ug nalagpot nga paingon sa truck.

Sa pagsuwat ning balita padayon nga giila ang namatay kun kadtong ID iyaha ba, samtang gikustodiya ang drayber sa truck. — /IBM (BANAT NEWS)