12 ka Senador naproklamar na

CEBU, Philippines —  Giproklamar na sa Commission on Elections (Comelec) sa The Manila Hotel ang 12 ka mga nakadaog nga mga senador sa bag-ohay lang natapos nga midterm election lima ka adlaw na ang nakalabay.

Ang 12 maoy magkompleto sa 24 ka lingkuranan sa Senado diin dunay nagpaabot nga 12 ka bakanteng pwesto para sa bag-ong mga napili.

Ang kadaghanan kanila mga incumbent senators nga subling gihatagan og mandato sa katawhan pinaagi sa boto.

Si Sen. Bong Go maoy nigawas nga numero unong senador nakakuha og 27.12 million votes, labaw siya og 7 million votes sa number 2 senator nga si Bam Aquino.

Si Aquino kinsa sa pagsugod sa pre-election surveys nagkapyot lang sa ika-12 nga spot nakahimo og upset sa tanang nag-una niya sa survey pinaagi sa iyang 20.97 million votes.

Si Aquino kinsa nidagan isip independent candidate gisuportahan sa national ug local Liberal Party leaders. Usa siya sa upat ka mga kanhi senador nga gihatagan pagusab og pagsalig sa katawhan.

Nahimo siyang kaniadto campaign manager ni kanhi Vice President Leni Robredo atol sa pagdagan niini og pagka-presidente niadtong 2022. Katimbang ni Aquino karon sa pagdagan sa senado ang running mate ni Robredo kaniadto nga si Sen. Kiko Pangilinan kinsa nakakuha sab og 15.34 million votes.

Sa pre-election surveys, nabiyaan og maayo si Pangilinan ni Aquino, wala gani makasulod sa Magic 12 kay naa lang kini sa 15th, apan gisurpresa ang tanan human sa eleksyon.

Ikatulo sa mga senador si Sen. Bato dela Rosa nga nakakuha sab og 20.77 million votes.  Sa wala pa siya nisulod sa politika, si dela Rosa maoy police chief ubos sa administrasyong Duterte ug maoy gihulagway nga chief architect sa gitawag nga “Project Double Barrel” or “Oplan Tokhang” sa maong administrasyon.

Sa pikas bahin, ang top-performing senatorial candidate sa administrasyon mao si Rep. Erwin Tulfo (ACT-CIS) nga naa sa ikaupat nga pwesto sa iyang 17.12 million votes. Igsuon siya sa kasamtangang Senador nga si Raffy Tulfo nga mao say nag-una sa Senate race niadtong 2022.

Usa si Erwin sa tulo ka mga senador nga first timers sa Senado ubos sa  20th Congress, kauban silang Rep. Rodante Marcoleta (SAGIP) ug Rep. Camille Villar (Las Piñas, Lone District) nga naa sa ikaunom ug ikanapulo.

Silang duha parehong giendorsar ni Vice President Sara Duterte, bisan pa og sie Villar parte Alyansa slate ni Presidente Ferdinand Marcos Jr.

Ang ubang senators-elect mao silang kanhi Sen. Ping Lacson, kanhi Senate President Tito Sotto, Sen. Pia Cayetano, ug Sen. Lito Lapid nga tanan ubos sa slate ni Marcos. Nakuha nila ang ikapito, walo, siyam ug ika 11 nga pwesto.

Silang Lacson, Cayetano ug Lapid mag-upat ka higayon na nga nahimong senador samtang ikalima na kini para ni Sotto.

Ang naa sa ika-12 mao ang igsuon ni Marcos nga si Sen. Imee Marcos nga nakakuha og 13.34 million votes.

Atol sa kampanya, nabahin si Imee tali sa iyang igsuon ug sa mga Duterte — sa sinugdanan kuyog siya sa Alyansa dayun nibiya sa grupo ug nitapon sa bise presidente.

Ang bag-ong mga senador molingkod sulod sa unom ka tuig gikan 2025 hangtud 2031 ubos sa 20th ug 21st Congresses of the Philippines. Manumpa sila karong Hunyo 30.

Gipaabot karon ang mamahimong kapalaran ni VP Duterte sa ipahigayong impeachment trial karong Hulyo. Kinahanglan og 16 ka boto sa senador aron ma-impeach si Duterte. (BANAT NEWS)