Panudlanan sa Mandaue City susihon ni Ouano

CEBU, Philippines —  Gipadayag ni Mayor-elect Thadeo Jovito “Jonkie” Ouano nga usa sa iyang mga prayoridad sa pagsugod sa serbisyo publiko sa Hulyo 1, 2025 mao ang pagpahigayon og audit sa financial standings sa Siyudad sa Mandaue.

“Kinahanglan gyud nato i-audit ang financial standing sa siyudad,” matud ni Ouano.

Matud pa niya, nakadawat siya og report nga ang kasamtangang administrasyon nag-hire og sobra ka daghang job order (JO) employees nga iyang tan-awon og imbestigahon.

“Dugay na gyud na namo nadungog nga sobra-sobra daw ang mga job orders,” ingon ni Ouano sa mga reporters sa Cebu Provincial Capitol niadtong Mayo 13, 2025.

Gibutyag usab ni Ouano nga ang administrasyon karon nagtukod og buhatan nga gitawag og Purok Development Office aron i-accommodate ang mga purok leaders.

“Ato na siyang susihon una,” iyang giingon.

Gipasabot ni Ouano nga kun makompleto ang audit ug makit-an nga kwalipikado ang mga trabahante, padayon silang pabilin sa ilang trabaho. Apan kun dili sila kwalipikado, kinahanglan silang tangtangon aron maprotektahan ang pundo sa siyudad.  “Kinahanglan silang tangtangon para matipid ang siyudad,” dugang pa ni Ouano.

Matud ni Ouano, ang pundo nga gigahin alang sa JO workers mas maayo unta nga i-realign o gamiton para sa social services alang sa mga Mandauehanon.

“Pwede nato na ma-realign sa ubang serbisyo nga magamit nato alang sa social services sa siyudad,” ingon pa niya.

Usa pa sa iyang mga prayoridad mao ang pagtukod og kaugalingong building para sa Mandaue City College, nga karon naa sa Mandaue City Cultural and Sports Complex nagpahigayon og klase. Miingon siya nga tan-awon sa una ang feasibility sa gi-propose nga location nga gi-identify sa karon nga administrasyon.

Apan, kun siya ang papilion, mas gusto ni Ouano nga ibutang ang Mandaue City College sa Barangay Paknaan, duol sa plano nga tukoron nga Mandaue City Oval, aron duol ug mas accessible ang mga pasilidad sa mga estudyante. “Murag 18 na ka tuig, eskwater gihapon sila diri sa sports complex,” matud ni Ouano.

Mahitungod sa pundo, miingon siya nga iyang tan-awon ang budget nga gigahin alang sa proyekto.

Apan tungod kay napili og usab ang iyang igsoon nga si Rep. Emmarie “Lolypop” Ouano-Dizon isip lone district representative sa siyudad, posible nga mangayo siya og tabang sa iyang igsoon o mangayo og suporta gikan sa national government. Gisaad usab ni Ouano nga ipadayon niya ang mga proyekto nga gisugdan sa kasamtangang administrasyon, kay gigastohan na kini sa siyudad gamit ang pundo sa katawhan.

“Atong ipadayon, gigastohan naman na sa pundo sa siyudad sa Mandaue,” matud ni Ouano. Gipasabot niya nga ang mga proyekto kinahanglan nga ipadayon bisan pa sa kalahi sa politikanhong kolor.

“Kining politika magtuyok ra man gyud ni—magkuyog ta karon, magbuwag, unya magkauban ra gihapon puhon,” matud ni Ouano. (BANAT NEWS)