Rama nagtinguhang magtukod og Legal Aid Office sa siyudad

CEBU, Philippines —  Nagtinguha si councilor-elect Mikel Rama nga himuon niyang prayoridad ang pag- Institutionalize sa City legal aid para sa tanan ilabi na sa mga kabus nga mga konstituwente sa Dakbayan sa Sugbu.

Si Rama, kinsa usa ka abogado, miingon nga nasayod siyang daghang mga residente sa siyudad ang dili maka-afford og legal services tungod sa kamahal niini.

“In Cebu City, it’s not uncommon for people to deal with legal concerns in silence simply because legal services are not affordable,”matud niya.

Apan niining bag-o, ang Supreme Court miaprubar sa Rules on Unified Legal Aid Service (ULAS) nga nagmando sa tanang abogado nga kinahanglang mogahin sila og 60-oras nga free legal aid  kada tulo ka tuig  o ba kaha mohatag og donasyon para sa Legal Aid Fund.

Dugang pa sab niini, ang revised Law Student Practice Rule (A.M. No. 19-03-24-SC) nagdasig sa mga law students, ubos sa superbisyon sa ilang mga eskuylahan pinaagi sa ilahang Clinical Legal Education Programs (CLEP)  nga motabang sa mga nagkinahanglan og legal assistance.

“These reforms move the profession toward making legal services easier to access for those who need them most,” matud pa ni Rama.

“The idea of institutionalizing legal aid through government support has been on my mind since my early days as a legal practitioner," dugang pa niini.

Samtang wala pa siya opisyal nga nakalingkod pagka-konsehal, apan iyaha ng gipahibalo pinaagi sa social media nga nagtinguha siyang moduso og ordinansahon para niini. Gusto ni Rama nga dunay city-level legal aid program  ang siyudad diin ang mga abogado makatampo ubos sa ilang ULAS og pro-bono services isip mga supervising lawyers para sa CLEP-participating law students.

Ang ordinansa magtukod sab og City Legal Aid Office aron mohimo sa mga koordinasyon, dokumento ug pagsigurong nisunod ang tanan sa ULAS ug CLEP regulations. Aron molampos ang iyang tinguha, magpatabang si Rama sa Integrated Bar of the Philippines (IBP) aron motabang pagpangita kun kinsay ibutang nga mga volunteer lawyers, mo certify sa ULAS compliance ug law school CLEP programs.

Samtang ang local government unit (LGU) gipaabot nga maoy mosuporta sa City Legal Aid Office ug Barangay Legal Aid Desks ingon man sweldo sa mga  support staff lakip na ang pagila kun kinsay kwalipikadong benepisaryo niini.

Giangkon hinuon ni Rama nga posibleng magkaproblema sa pundo, oversight, ug logistics bahin ani mao nga kinahanglan pa kining tun-an og maayo.

“But I think it’s worth considering now,” he said, adding, “Supreme Court and the Legal Education Board have taken the first big steps. I hope we stakeholders also start thinking about how these reforms can really come to life and be responsive to the needs of the people.” (BANAT NEWS)