Pito sikop sa managlahing operasyon batok illegal drugs

CEBU, Philippines —  Apat ka mga indibidwal ang nadakpan dihang gironda sa mga operatiba sa PDEA-7 ug PNP Regional Intelligence Unit-7 ang usa ka drug den sa sitio Sto. Niño Kintanar, Barangay Cogon Pardo, dakbayan sa Sugbo niadtong Biyernes sa hapon, Mayo 16, 2025.

Si PDEA-7 Acting Regional Director II Alex Tablate miila sa subject sa operasyon ug drug den maintainer nga si alyas Gilbert, 37 anyos, wala'y trabaho, nagpuyo sa Barangay Inayawan ning siyudad.

Laing nadakpan mao ang tulo nga nibisita sa drug den nga sila si alyas Bobby, 44 anyos, e-bike driver; alyas Jimrex, 39 anyos, construction painter; ug alyas Jexter, 30 anyos, construction painter nga pulos taga Barangay Cogon Pardo.

Nasakmitan ang mga suspetsado og pito ka putos sa gituohang shabu nga nitimbang og 10 gramos ug nagkantidad og P68,000, buy-bust money, kwarta nga P130 nga gituohang halin sa illegal nga drugas ug nagkalain-laing drug paraphernalia.

Ang maong operasyon resulta kini sa impormasyon nga nadawat sa mga operatiba gikan sa confidential informant.

Gipaubos kini sa usa ka semana nga case build-up ug nasuta nga maka dispose kini og 100 grams nga shabu kada semana.

Ang mga ebidensiya nga nakuha gisumetir na sa PDEA-7 Regional Office Laboratory alang sa chemical analysis ug proper disposition.

Kasong kalapasan sa Sections 5, 6, 7, 11, ug 12, Article II sa Republic Act 9165 ang ipasaka batok sa mga suspetsado.

Samtang nasikop ang usa ka 15 anyos nga pusher og shabu kauban sa 30 anyos niining inahan sa buy bust operation nga gipahigayon sa kapolisan sa Presinto 2 sa Mandaue City Police Office (MCPO) sa dalan M. Logarta sa Barangay Subangdaku, Siyudad sa Mandaue alas 10 pasado sa miaging Biyernes sa gabii.

Ang Officer -In-Charge sa Presinto 2 nga si Police Major Jonathan Bethooven Taneo ang nakadawat og impormasyon labot sa ilegal nga kalihokan sa mga dinakpan nga mga molopyo sa Barangay Mambaling, Siyudad sa Sugbo. Nakuha gikan sa minor de edad ang 25 gamo nga shabu nga nagkantidad og P170,000 base usab sa Price Standard Drug Value niini.

Suma pa sa dinakpan nga naa sulod sa bilangguan ang tag-iya sa shabu ug gisugo lang siya sa paghatod bugti usab sa P5,000 nga suhol

Samtang usa ka pusher og shabu nga nag-atubang og kaso sa korte ang nadakpan usab sa kapolisan sa Liloan Police Station pinasikad sa Warrant of Arrest sa gipuy-an niining panimalay sa Purok Kamunggay, sitio Baybayon, Barangay Catarman sa Lungsod sa Liloan.

Si Police Major Mawi Arcilla, hepe sa Liloan Police Station miila sa ilang nadakpan nga mao si alyas Joemar, 43 anyos nga nagpuyo usab sa maong dapit.

Sa kalapasan sa Section 5 ug Section 11 ubos sa Article 2 sa Republic Act 9165 o Comprehensive Dangerous Drug Act of 2002 ang korte wala morekomendar og piyansa alang sa temporaryong kagawasan niini.