DILG nag-awhag sa mga LGU pagsagop sa digital payments
CEBU, Philippines — Aron iduso ang digital transformation sa gobyerno, ang Department of the Interior and Local Government (DILG) nag-awhag sa tanang local government units (LGUs) sa pagsagop sa electronic payment and collection systems (EPCS) isip alternatibo sa tradisyonal nga cash transactions.
Sa usa ka memorandum circular, gidasig sa DILG ang mga LGU nga ipatuman ang EPCS alang sa pagkolekta sa lokal nga buhis, fees, ug uban pang mga bayranan, subay sa Executive Order No. 170, s. 2022 sa paggamit sa digital payments para sa mga transaksyon sa gobyerno.
Gihatagan og gibug-aton sa Departamento nga ang mga digital payments nagpauswag sa "transparency, efficiency, ug public convenience".
"LGUs are encouraged to offer secure, accessible digital options, ensure payment channels are user-friendly, and partner with authorized providers, including government servicing banks. All efforts must align with the National Retail Payment System Framework and the Data Privacy Act," matud sa DILG. Ang mga LGUs gilauman usab nga maghatag og klaro nga mga pamaagi sa pag-isyu sa mga electronic invoice ug billing notices, subay sa mga guidelines gikan sa Commission on Audit (COA) ug sa Bangko Sentral ng Pilipinas (BSP).
Samtang nagpasiugda sa digitalization, giklaro sa DILG nga kinahanglan gihapong modawat ang LGUs og cash ug uban pang tradisyonal nga paagi sa pagbayad aron masiguro ang accessibility sa tanan.
Aron suportahan ang hingpit nga implementasyon, ang mga LGU giawhag sa pagpasa sa mga ordinansa ug mga lokal nga polisiya, samtang ang DILG mipasalig sa paghatag og capacity-building initiatives aron pagtabang sa LGUs sa pagsagop sa sistema ug paggiya sa mga konstituwente sa paggamit niini.
- Latest
