Atty. Mikel Rama mopadayon sa nasugdan sa iyang amahan

CEBU, Philippines — Gitug-an ni kanhi Cebu City Mayor Michael Rama nga wala niya gipugos ang iyang anak nga si Atty. Mikel Rama nga modagan pagka-konsehal sa Dakbayan sa Sugbo.

Si Atty. Mikel kinsa nagpagsilong ubos sa Partido Barug – Team Rama Bag-ong Sugbo usa lang sa midaog sa nahitabong piniliay niadtong Mayo 12, 2025 kauban sila si incumbent councilors Phillip Zafra ug Francis Esparis ug Harry Eran.

Gisaysay ni Atty. Mikel ang mga rason kung nganong gisudlan na niya ang kalibutan sa politika. “Ang pagsud nako sa political process especially sa organization sa akong papa sa Partido Barug – Team Rama kay ako man nga na-recognize ang natukod sa akong papa sukad nga pagsud niya sa panerbisyo. And these things are intangible things—influence, relationships with people, ug ang structure gyud sa partido on what it represents, a reformist organization committed to good governance”, suma pa ni Atty. Mikel atol sa usa ka press conference.

Paniguron ni Atty. Mikel nga ipadayon ang nasugdan nga trabaho sa iyang amahan ug ipabiling buhi ang natukod nga partido.

“Samtang naay dugo nga Rama sa akong ugat, dili gyud ko mosugot nga mapapas ang gitukod sa akong amahan”, paghimug-at pa ni Atty. Mikel.

Kahinumduman nga si Atty. Mikel gitanyagan kaniadto og posisyon isip kabahin sa Sangguniang Panglungsod niadtong Oktubre 2024 apan iya kining gibalibaran tungod kay buot niya nga makaangkon sa posisyon nga iya gyud nga hinaguan. (BANAT NEWS)