Usa patay ug usa naangol sa aksidente sa motor sa brgy Busay

CEBU, Philippines — Usa patay samtang usa sab ang naangol sa nahitabong disgrasya sa motorsiklo sa Upper Busay, Barangay Busay, siyudad sa Sugbo kagahapon sa kadlawon, Mayo 12, 2025.

Ang namatay mao si Dexy Dave Ochea, 24 anyos, nagpuyo sa Purok 3, Sudtunggan, Barangay Basak, dakbayan sa Lapu-Lapu samtang ang naangol mao si Luis Rosel Jr., 25 anyos, molopyo sa Ibabao, Basak, Lapu-Lapu City.

Nasayran nga si Ochea maoy driver sa Honda click motorcycle samtang angkas niya si Rosel. Base sa imbestigasyon sa Traffic Enforcement Unit sa Cebu City Police Office(CCPO) ang mga biktima sakay sa motorsiklo nagbiyahe sa Transcentral Highway (Busay Road) paingon sa Cebu City Proper.

Pag-abot sa kurbadahon nga bahin sa dalan giingong na-overshoot ang motorsiklo sa biktima ug nabangga sa riprap fence. Gumikan sa kakusog sa disgrasya ang driver ug angkas sa motorsiklo nakaangkon og grabeng kadaut sa lawas.

Si Ochea daling gidala sa Vicente Sotto Memorial Medical Center apan gideklarar kini nga dead-on-arrival samtang ang angkas nga si Rosel gidala sa Cebu City Medical Center. (BANAT NEWS)