Taga Bantay Dagat ang nibangga sa mananagat

CEBU, Philippines — Kasong complex crime of murder ug murder ang gipasaka sa kapulisan sa Bohol Police Provincial Office (BPPO) batok sa lima ka indibidwal nga giingong miyembro sa Bantay Dagat sa Barangay Pitogo, Lungsod sa Carlos P. Garcia ug maoy responsable sa matud pa sa pagbangga sa pumpboat sa duha ka mananagat nga nakabsan sa kinabuhi sa kadagatan sa Barangay Malingin, Lungsod sa Bien Unido, Probinsya sa Bohol niadtong Mayo 2, 2025.

Niadtong adlaw'ng Biyernes, Mayo 9, 2025 gipasaka ang kaso sa Provincial Prosecutors Office batok sa lima ka indibidwal kinsa ang tulo nailhan na sa kapulisan nga mao sila si alyas Taga, alyas Nali ug alyas Amang.

Matod ni Police Lieutenant Colonel Norman Nuez, tigpamaba sa Bohol Police Provincial Office nga pinaagi sa mga saksi nailhan ang responsable sa maong hitabo diin positibo nilang gitudlo nga ang lima nga sakop matud pa sa Bantay Dagat mibangga sa pumpboat sa mga biktima nga sila si Rene Awas Reyes ug B-Jay Manayon.

"Pagkahitabo man gud ani matud pa sa mga witnesses nga gagukod kuno niya duol lang pud kuno sa baybay so daghan ang nakakita, diha puy mga kauban nga mga mananagat nga diha pud sa duol sa hitabo, katong naka-rescue bitaw di ba naay video nga maoy nagdala didto daplin sa baybay nakaila pud sila sa mga suspetsado, mao pud ‘toy ni-identify pud ani nila," sigon ni Nuez.

Una niini, gihimakak sa BPPO nga mga polis ug ilang mga Bantay Dagat nagpahigayon og maritime law enforcement operations sa maong lugar, basi kini sa pangangkon sa mga hepe sa kapolisan sa mga lungsod duol sa nahitaboan.

Padayon pa sab ang ilang imbestigasyon aron mailhan ang laing duha nga nalambigit sa hitabo.  Gumikan kay nahitabo ang insidente niadto pang Mayo 2, 2025 ang mga gipasakaan og kaso dili na mamahimong dakpon kung walay warrant of arrest.

Gisunod sa kapulisan ang proseso nga mao ang pagkiha sa mga suspetsado ngadto sa piskalya ug kung mapamatud-an nga dunay lig-on nga ebidensya masang-at na kini ngadto sa korte diha na kini mopagawas ug arrest order sa mga gipasanginlan.

Giklaro ni Lt. Col. Nuez nga wala'y police nga nalambigit sa maong hitabo sukwahi sa nigawas sa social media. — /IBM (BANAT NEWS)