Kaugmaran sa Siyudad sa Sugbo maoy tinguha sa tulo ka kandidato

CEBU, Philippines — Tanang mga kandidato nga magpapili karong piniliay adunay maayong tumong ug tinguha alang sa ilang pinalanggang syudad o lungsod.

Sama na lang sa tulo ka magpapiling mayor sa Dakbayan sa Sugbo nga sila si Cebu City Mayor Raymond Alvin Garcia, duly elected mayor Michael Rama ug si incumbent councilor Nestor Archival.

Ang tulo adunay mga maanindot nga mga plano alang sa kaugmaran sa siyudad sama nalang sa pagsulbad sa dagan sa trapiko, pagsagop sa bag-ong matang sa teknolohiya ug ang palambo sa turismo.

Sa pagkakaron, ang siyudad nag-atubang og dakong problema sa dagan sa trapiko diin nakamugna og mga posibleng solusyon si Mayor Garcia.

Giangkon ni Garcia nga ang problema sa trapiko dili kini masulbad sa usa ka adlaw lang sama nalang sa nasinati sa laing mga nasud nga kinahanglan nga tun-an pag-ayo una ipa-implementar ang mga solusyon.

Dugang pa niya nga bisan og usa ra ka problema ang trapiko apan nagkinahanglan kini og daghang solusyon sama na lang sa ipatuman nga mass transportation aron maminusan ang mga pribadong sakyanan nga modagan sa kadalanan ug magkat-on na ang mga tawo nga mobilin sa ilang mga sakyanan tungod kay aduna nay daghang pamaagi unsaon pag-abot sa destinasyon sa mga tawo.

Dugang solusyon ni Garcia mao ang kinahanglan nga pagdisiplina sa mga drayber, ug paghimo og dugang ug lapad nga mga karsada ug magbutang og dagkong parking area.

Samtang si Konsehal Archival nipaila sa usa ka solar-powered nga sakyanan ug charging system nga gidisenyo alang sa 24/7 nga paggamit sa gobyerno diin zero fuel cost ug less maintenance ug makadaginot gyud ang gobyerno gikan sa P500 milyon nga gigahin nga pundo alang sa fuel. Isip usa ka environmentalist, ang maong sakyanan eco-friendly ug nagpasa sab si Archival og resolusyon sa konseho nga awhagon ang mg executive department sa pagsuway sa maong bag-o nga matang sa teknolohiya aron nga makatabang og pagsalbar sa kinaiyahan.

Samtang, si Rama naglaraw nga maghimo og boardwalk gikan sa Radisson Blu sa Serging Osmena Boulevard paingon sa Port San Pedro, Plaza Independencia, Compania Maritima hangtud na sa Barangay Inayawan.

Ang iyang ideya nga ibalhin ang City Hall sa South Road Properties, matud pa ni Rama nga himoon kining museum sama sa Amerika nga adunay Smithsonian Institution nga usa ka inila nga museyo ug research complex sa Washington, D.C.

Plano sab ni Rama nga magpabutang og cruise ships nga mahimong bag-ong kalaagan sa mga Sugbuanon sama nalang sa Barcelona, Spain.

Dugang pa ni Rama nga mas palambuon pa ang pedestrianization sa tibuok siyudad kun diin "walkable" na ang downtown area ug makita labi na sa mga turista nga ang Siyudad sa Sugbo usa ka Heritage City. —/MEL (BANAT NEWS)