Otso anyos nga bata nalumos sa lungsod sa Alegria

CEBU, Philippines — Patay ang usa ka otso anyos nga batang lalaki human kini nalumos sa Cancalanog Falls sa Barangay Compostela, Alegria Cebu niadtong Martes sa hapon.

Ang bata residente sa Purok 3, Estaca, Barangay Tunghaan, sa Lungsod sa Minglanilla.

Base sa imbestigasyon sa kapolisan ang biktima kuyog kini sa igsuon ug sa amahan sa pagpangaligo sa falls human giimbitar sa pag-uban sa outing.

Ang biktima giingong gipasidan-an sa amahan sa ilang pagpaniudto nga dili maligo una ilabi na kay dili kini kahibalo molangoy.

Apan giingong wala mabantaye sa amahan ang anak nga kini nilakaw ug didto nabatyagan nga nawala kini hinungdan nga ilang gipangita sa pagtuo nga kini naglaag-laag lang. Atol sa ilang pagpangita ila na lang nasayran gikan sa laing bata nga mitahu nila nga nalumos na kini ug giingong taud taud na nga didto ilawom sa tubig.

Ang biktima dali unta kini nga gitabang ug gidala sa tambalanan apan nakutloan gayud sa iyang kinabuhi.  MEL BANAT NEWS