12 ka OFWs nga nauli sa nasud gitabangan sa OWWA
CEBU, Philippines — Mihatag og tabang ang Overseas Workers Welfare Administration (OWWA) Region 7 sa 12 ka mga nauli nga Overseas Filipino Workers (OFWs) nga nangabot sa Cebu ug Bohol gikan Mayo 2 hangtud 6, 2025.
Kini nga mga OFW, matud sa OWWA-7 kasagaran nagtrabaho isip mga domestic worker sa mga nasud sa Middle East ug gipapauli tungod sa pagmaltrato sa ilang mga amo, contract violations, ug mga isyu sa panglawas.
Niadtong Mayo 2 sa buntag, tulo ka distressed OFWs nga domestic helpers ang nangabot sa Sugbo gikan sa Oman, Saudi Arabia, ug Bahrain human nakasinati og pagmaltrato sa amo niini ug tungod sa paglapas sa kontrata.
Sa udto anang adlawa, laing duha ka OFWs nga biktima usab sa contract violations niabot gikan sa Saudi Arabia ug gihatagan og transportation support aron makauli nga luwas sa ilang pinuy-anan sa Cebu.
Samtang niadtong Mayo 3, tulo ka nauli nga OFWs gikan sa Saudi Arabia ug Oman nangabot sa Bohol, diin nakadawat sila og transport ug meal assistance aron makauli sa ilang tag-tagsa ka lungsod. Duha ka adlaw ang milabay, sa Mayo 6, laing upat ka OFWs, tulo ka distressed ug usa ka medically ill, ang niabot usab sa Cebu human nauli gikan sa Saudi Arabia tungod sa health concerns ug contract violations.
"We made sure they received the necessary transportation assistance to return to their beloved hometowns," matud sa ahensya. MEL BANAT NEWS
- Latest
