Bangkarera Paddle Boat Race malamposon

CEBU, Philippines — Malampuson ang gipasiugdahan nga Race 2025 nga gipahigayon sa Pajara nga nahimutang sa Mactan Channel sa ubos nga bahin sa Marcelo Fernan Bridge sa Barangay Umapad sa Siyudad sa Mandaue.

Ang maong indigay sa lumba sa kadagatan maoy kabahin sa gihan-ay nga mga kalingawan sa pagsaulog sa tinuig nga piyesta ni Senyor San Jose nga maoy patron sa Siyudad sa Mandaue.

Ang fiesta pagahimoon sa matag petsa 8 sa bulan sa Mayo. Nahimo usab kining kabahin sa kalihokan nga gipasiugdahan sa kagamhanan sa dakbayan sa Mandaue nga mao ang Mid-Year Cultural Summit 2025.

Gisaksihan sa mga Mandauehanon ang maong kompetisyon sa kadagatan gamit sa pagbugsay sa sakayan nga niining tuiga gitawag og Bangkarera Paddle Boat Race.

Kini giapilan sa walo ka mga participants gikan sa coastal nga kabarangayan nga naglakip sa barangay Looc, Subangdaku, Opao, Umapad, Paknaan, Basak, Labogon, ug Jagobiao.

Gibahig sa duha ka mga kategoriya nga naglakip sa Men's ug Women's category. Ang Bangkarera Paddle Boat Race gitumong sa mga nagpasiugda alang sa pagpakita sa mga Mandauehanon sa ilang kultura ug sa paddling skills

Sa nasayran ang mga Mandauehanon naila na usab sa pagsalmot sa Team Philippines sa Dragon Boat's ug world's boating skills. — /MEL (BANAT NEWS)