Supervisor gipusil patay

CEBU, Philippines — Patay na nga nadala sa tambalanan ang usa ka motorista nga biktima sa pagpamusil sa wala pa hiilhing mamumuno alas 11 pasado sa Sabado sa buntag sa Cansaga Bridge habig nga bahin sa Barangay Paknaan, Siyudad sa Mandaue.

Giila sa kapolisan sa Presinto 3 sa Mandaue City Police Office (MCPO) ang biktima nga mao si Rudy Ponce, 58, taga Barangay Calawisan sa Siyudad sa Lapu-Lapu.

Giingong nagtrabo kini isip assistant haul supervisor sa usa ka shipping company nga nahimutang sa Lungsod sa Consolacion.

Gikatahong sakay sa iyang mlotorsiklo ang biktima nga gituohang padulong sa iyang trabahoan sa dihang gisikitan kini og laing motorsiklo ug ang sakay niini kalit mipaulan kaniya og bala.

Ang motorsiklo sa mamumuno matud pa sa mga nakasaksi walay nakabutang nga plate number.

Ang mamumuno nagsul-ob og itom nga jacket, itom nga helmet ug nagsul-ob usab  og short pants nga gituohang daan nga gasunod sa biktima.

Ang team sa kapolisan sa Presinto 3 sa MCPO nga gipangulohan ni Police Lieutenant John Aldrin Baligad padung pa sa ilang imbestigasyon.

Dili layo sa nahitaboan, adunay nakapwestong mga polis sa ubos nga bahin sa maong taytayan kinsa mao say daling niresponde.

Ang Paknaan Emergency Response Team dali maoy  nga nagdala sa  biktima ngadto sa Mandaue City Hospital apan gideklarar kini sa mga doktor nga dead on arrival. Ang gunman daling miikyas padung sa direksyon sa Consolacion.

Ang kapolisan nisubay na sa mga establisamento sa pamasin makakuha og footage sa motorsiklo aron pag-trace sa tagiya niini ug sa mamumuno