18M ka gradwado sa highschool gikonsiderar nga “functional illiterate”
CEBU, Philippines — Adunay kapin sa 18 ka milyon nga mga gradwado sa high school ang gikonsiderar nga “functional illiterate,”.
Kini base sa taho sa Philippine Statistics Authority (PSA) diin nasuta sa resulta sa 2024 Functional Literacy, Education, and Mass Media Survey (FLEMMS) nga kapin sa 18.9 milyon ka mga gradwado sa high school gikan sa 2019 hangtud 2024 ang functional illiterate.
Suma pa sa PSA wala kini makakab-ot sa ilang updated nga definition sa functional literacy para sa 2024 cycle, nga mao ang abilidad sa pagbasa, pagsulat, pagkwenta, ug paggamit sa mas taas nga lebel sa pagsabot.
Gipasalig sa Department of Education (DepEd) nga gipalig-on na sa gobyerno ang mga interbensyon sa pagkat-on sa mga tunghaan.
Tungod niini, si DepEd Secretary Sonny Angara miingon nga ang gobyerno nagpalambo karon sa pamaagi sa pagtudlo ug pagbasa ingon man sa remedial ug literacy programs sa mga eskwelahan.
"Hindi namin hahayaang may batang nahuhuli sa pagbasa at pag-unawa. The recent FLEMMS results on functional literacy highlight what we have long recognized-- literacy must be at the heart of our education reforms,” matud niya.
Imbis na pagsag-ulo, ang ahensya naningkamot sa pagtabang sa mga estudyante nga mahimong mga critical thinkers samtang gitudloan sila sa mga kahanas sa ika-21 nga siglo.
"Kumikilos ang DepEd para itama ang kahapon at ihanda ang bawat bata para sa mas matibay na kinabukasan. Ensuring that every Filipino learner is functionally literate is a commitment we owe to our constituents," dugang ni Angara. (BANAT NEWS)
- Latest
