Gipatay kay di sa ilaha tigpalitan og drugas?
CEBU, Philippines — Patay ang usa ka e-bike driver human gipusil sa duha ka wala pa mailhing tawo diha sa Salvador Extension, Barangay Labangon, siyudad sa Sugbo niadtong Huwebes sa gabii, Mayo 1, 2025.
Ang biktima mao si Ariel Sacamay, 36, residente sa Sitio Sto. Rosario, Barangay Labangon ug usa ka e-bike driver.
Nagkanayon ang kapuyo sa biktima nga padulong mamasahero ang iyang pares gamit ang e-bike sa ilang silingan sa dihang kalit lang kini giduol sa duha ka wala pa mailhing mga lalaking sakay og motorsiklo ug gipusil kini lima ka higayon. Nakaangkon og samad pinusilan sa nagkadaiyang parte sa lawas ang biktima nga gidala pa sa Cebu City Medical Center apan gideklarar nga dead-on-arrival.
Personal nga bangi ug kalambigitan sa illegal nga drugas ang gisubay nga anggulo sa kapulisan sa Labangon Police Station 10 Cebu City Police Office sa maong hitabo.
Sigon pa sa kaipon sa biktima nga ang iyahang kaipon dunay nakaaway nga mga silingang drug pushers kay nasuko nga dili kini sa ilaha magpalitan og ginadiling drugas.
Narekober sa crime scene ang lima ka mga kabhang sa kalibre .45 nga bala. (BANAT NEWS)
- Latest
