Lalake nga nangawat sulod sa kan-anan nasikop

CEBU, Philippines — Nabalhog sa prisuhan ang usa ka 22-anyos nga lalake human gidakop kay nisulod og kan-anan ug giingong nangawat sa Poloy’s Eatery, diha sa N. Bacalso Avenue, Barangay Bulacao, siyudad sa Sugbo niadtong Domingo sa kadlawon, Abril 27, 2025.

Ang suspetsado mao si Jeprey Matas Tabanao, nga taga Amayan, Dakbayan sa Carcar.

Samtang ang biktima mao si Maricel Carticiano, 37-anyos, dunay kaipon, food vendor ug taga Sitio Villa Manga, Barangay Bulacao, Cebu City.

Sa impormasyon sa kapolisan sa Inayawan Police Station 7 ang suspetsado gidakop sa mga tanod nga sila si Jaime Wenceslao, 35 anyos ug Roberto Sabejon, 58 anyos human nga gisulod sa suspetsado ang kan-anan sa biktima ug gikawat ang amplifier ug speakers.

Nasayran nga samtang ang biktima ug ang kaipon niini natulog sulod sa kan-anan ang suspetsado nakasulod kay gitangtang ang kahoy nga bongbong.

Dihang nakasulod na kini gikuha sa suspetsado ang amplifier ug duha ka speakers ug gibutang gawas sa pultahan.

Gisuwayan usab sa pagkuha ang profane gas apan ang biktima nakamata ug napugngan ang suspect sa pagdagan gawas sa kan-anan.

Niabot ang mga barangay tanod ug gidakop ang suspect ug gidala sa police station.

Nasayran ang amplifier nagkantidad og P6,000 samtang ang duha ka speaker nibalor og P10,000. (BANAT NEWS)