12 gun-for-hire groups napuhag
CEBU, Philippines — Gipahibawo sa Police Regional Office-7 nga naa na sa 12 ka gun for hire groups ang na-neutralize nila sukad gisugdan ang gun ban niadtong Enero 12 hantod ning tungura.
Sigon ni PRO-7 Regional Director Brigadier General Redrico Maranan nga dul-an sa 40 ka mga miyembro ug leaders sa gun for hire groups ang nadakpan ug sobra sa 300 loose firearms ang nasakmit sa kapulisan.
Tulo na sab ka ilegal nga tighimo og paltik nga armas ang gioperasyonan sa kapulisan sa dakbayan sa Danao.
Gusto ni Maranan nga kun kinsa katong mga nag-produce og loose firearms ug tig-provide og loose firearms sa gun for hire apil sa puhagon.
"Mas paiigtingin pa natin for the remaining two weeks before elections. Tayo ay tuloy-tuloy, may bago na naman tayong huli na member ng gun-for-hire groups, yung involve naman sa pagpatay doon sa Busay, so tuloy-tuloy ang ating kampanya laban sa mga gun for hires," sigon ni Maranan.
Sa laing bahin, gibalhog sa prisohan sa Pari-an Police Station 1 Cebu City Police Office ang usa ka 46-anyos nga drug personality human nasakpang nagdala-dala og armas sa Sitio Laguna, Barangay Lorega San Miguel, Dakbayan sa Sugbo niadtong Domingo sa gabii, Abril 27, 2025.
Ang suspek mao si Edward Lacre Giltendez, 46, taga Salvador Extension, Barangay Labangon, siyudad sa Sugbo.
Sa impormasyon gikan sa kapolisan, duna silay Detective Patrolling batok sa tanang matang sa illegal activities subay na sa Simultaneous Anti-Criminality Law Enforcement Operation (SACLEO) sa naasoy nga dapit.
Naaktuhan nila ang suspek nga nagbitbit og .38 kalibre nga armas hinungdan nga kini gidakop. Nakuha gikan niya ang maong armas nga dunay tulo ka bala.
Matud pa sa kapolisan notadong drug personality ang suspek diha sa lugar. (BANAT NEWS)
- Latest
