Mekaniko, amahan ug anak sikop sa buy-bust  

CEBU, Philippines — Nadakpan atol sa buy-bust operation sa City Drug Enforcement Unit Cebu City Police Office ang usa ka mekaniko nga gikatahong high value individual diha sa Sitio Sinulog, Barangay Mabolo, Siyudad sa Sugbo sa niaging adlaw.

Ang suspetsado mao si Gex Dexlier Cañete Armamento alyas “Didang”, 34-anyos, mekaniko, nagpuyo sa Upper Yati, Lungsod sa Liloan.

Nasakmit sa kapolisan gikan sa suspetsado ang 400 gramo nga shabu nga nikantidad ngadto sa P2.7 milyones.

Gikataho nga moabot sa 400 gramo nga shabu ang ma-dispose sa suspetsado matag semana.

Sa laing bahin, nasikop usab atol sa buy-bust operation sa Municipal Drug Enforcement Unit (MDEU) sa Compostela Police Station ang amahan ug anak nga mga suspetsadong pusher niadtong Sabado diha sa Purok Nangka Barangay Bagalnga, Lungsod sa Compostela.

Ang suspetsado giila sa kapolisan nga si Hilario Montalvo Melendres, 66-anyos, minyo ug anak niining lalaki nga si Reylan Ochea Melendres, 39-anyos, ulitawo, pulos nagpuyo sa maong dapit.                                                                                                                             

Si Police Captain Tryss Galvan III, officer–in-charge  sa kapolisan sa maong lungsod maoy nangulo sa  pagpahigayon og buy-bust operation batok sa mga suspetsado.                                                                                                                                    

Nasakmit sa kapolisan ang P500 nga buy-bust money. P500 nga gituohang halin sa ginadiling drugas, Smith and Wesson .357 magnum revolver nga walay serial number ug adunay unom ka bala ug usa ka belt bag nga maoy gisudlan sa nasakmit nga armas ug ingon mga nasakmit nga pakete nga shabu. (BANAT NEWS)