Bus nasampak sa lubi, tulo angol

CEBU, Philippines — Angol ang tulo ka pasahero sa usa ka bus human sila aksidenteng nabangga sa punoan sa lubi sa Barangay Matab-ang, Toledo City niadtong Huwebes sa buntag, Abril 24, 2025.

Ang maong bus gimaneho sa usa ka Jonathan Lastimoso Lanorias, taga Colonia, Lungsod sa Tuburan.

Sa imbestigasyon sa Toledo City Police Station ang maong bus nagbiyahe gikan sa Lungsod sa Tuburan ug paingon sa siyudad sa Sugbo.

Apan pag-abot sa nahitaboan sa aksidente sa kurbadahon nga bahin sa karsada giingong dunay sakyanan ang kalit matod pa ni u-turn.

Gumikan niini, daling gitumban sa driver ang brakes apan nawagtangan kini og kontrol  sa manobela ug nabangga sa punoan sa lubi.

Ang tulo ka pasahero nga naangol ug daling gidala sa Toledo City Hospital aron matambalan.

Sa laing bahin, ang Regional Highway Patrol Unit(RPHU)-7 gikatakdang makigpulong sa mayor sa Lungsod sa Balamban, duha ka mga barangay kapitan, apektadong konstituwente ug apil ang Department of Public Works and Highway (DPWH) bahin sa mga nahitabong aksidente diha sa Transcentral Highway ubos sa ilang hurisdiksyon.

Sagad sa mga hinungdan sa disgrasya sa maong lugar mao kining mag banking-banking sa dalan, mag knee drag o shoulder dragging nga halos pahigdaon na ang motor ini og liko sa kurbada.

Sa ilang pulong-pulong nasabutan nga ang DPWH mag-install og rumble strip sa mga dalan kun asa  kanunay magkiat ang mga riders. "Atong gibuhat sige ta og monitor sa mga reels ug kanang mga content creators nag post sa YouTube. So kung duna tay makita nga nag perform og stunts niya making dangerous stunts dinha sa lugar kung makuha nato ang plate numbers o ma identify nato kinsa ang riders atong buhatan og report ug i-endorse sa LTO for a show cause," matud ni Police Colonel Wilbert Parilla, Regional Chief sa RHPU-7.  IBM BANAT NEWS