Mamuhatay og chicharon gipatay sa ig-agaw

CEBU, Philippines — Patay ang usa ka 40-anyos nga lalakeng manghimaoy og chicharon human gidunggab makadaghang higayon sa ig-agaw niini diha sa Proper Valladolid, Dakbayan sa Carcar niadtong Huwebes sa gabii, Abril 24, 2025.

Ang biktima mao si Gilbert Baran Lawas, 40, nagpuyo sa maong dapit ug manghimaoy og chicharon.  Samtang ang mga suspetsado mao ang ig-agaw niini nga si Rodulfo Lawas Jr., 41, residente sa maong dapit ug si Allan Campania, 50, kainom sa mga biktima ug suspek ug gidudahan sa pamilya nga gigunitan niini ang biktima dihang gidunggab sa suspek.

Usa ka Henry Salazar, 29, miingon sa kapolisan nga ang tulo gainom atbang ra sa balay ni Gilbert. Samtang nagkanta matod pa siya nibarog og kalit ang suspek ug giingnan ang biktima og 'boang ka' ug gidunggab dayon kini.

Gikan sa imnanan nidagan ang biktima sa ilang balay apan gigukod gihapon kini sa suspek ug gidunggab makadaghang higayon.

Matud pa ang suspek mogamit og illegal nga drugas ug giingong makadungog kini nga dunay mohunghong ug magsunod-sunod niya.

Ang maong insidente girespondehan sa Carcar City Police Station ug nasuta nila gikan sa asawa sa biktima nga si Kim Cabañete Lawas nga  silang Gilbert ug Rodulfo alas 3 pa sa hapon gasugod og inom anang adlawa sa gawas sa ilang panimalay.

Human sa krimen niuli sa iyang balay ang suspek bitbit ang kitchen knife nga gigamit sa krimen ug nisakay og motorsiklo ug misibat.

Apan nadakpan kini atol sa hot pursuit operation sa kapulisan sa Lower Tawog, Barangay Valladolid  Carcar City.

Positibo nga gilla sa mga saksi ang suspek nga maoy nagpatay sa biktima.

Na-recover sab sa kapulisan ang kitchen knife nga gigamit sa krimen, ang mga suspek pasakaan og kasong murder.  IBM BANAT NEWS