Oval road sa Hipodromo gikatakdang sementohon

CEBU, Philippines — Gikatakdang sementohon na ang 915 metros nga oval nga dalan sa Barangay Hipodromo human gipahigayon ang groundbreaking ug pinirmahay sa project plans kagahapon, Abril 25, 2025 sa Kahipa Multi-Purpose Gym.

Ang maong lugar sa Hipodromo adunay usa ka entrada ug gawsanan nga dalan.

Nikabat ngadto sa P10 milyones ang gibubo nga pundo niini sa kagamhanan sa Dakbayan sa Sugbo.

Si Mayor Raymond Alvin Garcia nagkanayon nga ang pagsikad sa pagsemento sa maong karsada usa kini ka dakong lakang aron nga matarong ang dalan sa maong barangay.

“Ang atong gibuhat kay long term ni nga pagpaayo sa atong dalan, dili kay every year sige ta og pasemento”, matud ni Garcia.

Matud ni Garcia nga ang pagpaayo sa maong dalan makatabang usab kini aron masugdan sa pag-ayo ang drainage system sa maong dapit ilabi na duol kini og sapa.

Samtang si Konsehal Jerry Guardo nagkanayon nga ang pagsemento sa dalan molungtad kini sa pipila ka mga katuigan itandi sa pag-aspalto nga molungtad lang sa duha ngadto sa tulo ka tuig.

Matud ni Guardo nga taod-taod na usab nga nidangop ang Barangay Hipodromo kaniya aron maatiman na ang pagpasemento sa ilang walo ka dalan diin nahimutang ang daghang panimalay lakip ang barangay hall, barangay gym ug mga tunghaan.

Sa iyang bahin, si Barangay Kapitan Ruperto Bacolod nagkanayon nga kon sugdan na ang pagtrabaho sa Hipodromo Oval Road adunay himuon nga temporaryo nga diversion road o magpatuman og one-way nga dalan aron moloag ang dagan sa trapiko. BDB BANAT NEWS