Huwes paluwaton og bench warrant, Espinosa dili pakandidatohon

CEBU, Philippines — Si Dr. Georgina Arevalo, mayoral aspirant sa Palompon Leyte mopadala og suwat ngadto sa huwes sa pagpaluwat og bench warrant kang dismissed mayor ug mayoral apirant Ramon Oñate ug laing mga sinumbong sa kasong malversation through falsification of public documents ug Section 3(e) sa Akta Republika 3019 kun “Anti-Graft and Corrupt Practices Act human wala kini sila mopatim-aw sa korte atol sa ilang arraignment ug mga abogado lang niini ang anaa niadtong Miyerkules aa buntag

Matud ni Arevalo nga makig-alayon usab sila sa Ombudsman Visayas kong unsay angayan nga buhaton alang sa maong gipasakaan og kaso. Si Arevalo nagkanayon nga nigawas na ang warrant of arrest batok kang Oñate ug mga kaubanan niini kalabot sa kasong kriminal niadtong Marso 13, 2025 ug sa maong adlaw nakapiyansa ug na-release kini. Gikataho nga gikatakda na unta ang ilang arraignment sa April 24, 2025 alang sa nahisgutang duha ka kaso apan walay nipakita sa korte sa sala ni Judge Dexter Aguilar sa Regional Trial Court (RTC), Eight Judicial Region sa Branch 17, Palompon, Leyte.

Gikataho usab nga ang mga gireklamo kaduha nibayad og piyansa.

Matud ni Arevalo nga naglibog sila sa ilang buhaton tungod kay wala nipatim-aw sa korte ang mga gireklamo diin mandatory nga kong arraignment kinahanglang mopatim-aw  sa korte.

Ang mga akusado adunay gipirmahan nga undertaking ug waiver of appearance ug nagtuo si Arevalo nga mahimo ang huwes moluwat og bench warrant hinungdan nga nagplano siya nga mo suwat sa korte ug manawag sa Ombudsman Visayas kabahin sa sunod nga lakang.

Sa laing bahin, si Police Lieutenant Colonel Jovie Espenido, kanhi hepe sa kapolisan sa Albuera Leyte niawhag kang mayoralty aspirant Kerwin Espinosa nga ihikling lang usa ang pagdagan niini ug sigurohon ang hingpit nga kausaban sa iyang kaugalingon.

Matud ni Espenido nga dili na sekreto ug gani giangkon niini nga usa siya ka drug lord ug nalambigit sa kalihokan sa ilegal nga drugas.

Si Espenido nagkanayon nga tambag hinigala ang iyaha kang Espinosa gumikan kay wala na siya sa otoridad diin dili nalang kini modagan ug mas maayo nga tutokan usa niini ang iyang kaugalingon, kapanginabuhian ug pagtabang sa pamilya aron makita sa katawhan ang iyang tinud-anay nga transformation sa iyang pagkatawo.  Giawhag usab ni Espenido ang katawhan nga magpili og kandidato nga dili makaguba sa dagway sa dapit ug sayod na usab sila kong kinsa si Espinosa. Gidasig ni Espenido ang katawhan nga pilion sa mga botante ang magdala og kausaban sa dapit sa Albuera nga masaligan ug walay record sa kinabuhi. BDB BANAT NEWS