Kilay miiknat

Kining bugas nga gipasiatab ni Presidente Bongbong Marcos nga ibaligya sa kagamhanan sa kantidad nga P20 matag kilo, gipalit kuno kini sa gobiyerno sa kantidad nga P33 ang kilo, pero ang P13 abagahon lang sa kagamhanan.

Buyno kon tuohan nato ang kadagkoan sa Department of Agriculture (DA) nga nindot nga klaseng bugas kining ibaligya og P20 ang kilo, ang sunod natong pangutana hangtud kanus-a man kining programaha?

Daghan man gud ang nagtuo nga makapalit lang ta og bugas nga barato ning panahon nga duol na ang eleksiyon, apan human sa eleksyon posible nga undangon na kini sa kagamhanan.

Dili ba kaha kini pagpanglingla lang aron nga ang katawhan makumbinser nga mobotar sa mga senador ug magbabalaod nga kaalyado sa administrasyon?

Ako hinuon, dili gyud ko motuo nga makalahutay ang kagamhanan sa pag-abaga sa P13 nga kantidad sa kada kilo nga paliton sa katawhan. Bisan pa og limitihan nila’g 10 lang ka kilo kada semana ang mapalit, apan sa kadaghang tawo sa nasud, maut-ot ang panudlanan sa kagamhanan.

Niining paagiha, mosamot og sulbong ang atong utang sa nasud gikan sa mga langyaw’ng tigpahuwam. Tiaw mo, dul-an na sa P16 trilyones ang utang sa nasud karon.

Pagbanos ni Presidente Bongbong sa administrasyon gikan kang kanhi Presidente Duterte, kapin pa sa P13 Trilyones ang utang sa nasud, apan karon misulbong na pag-ayo.

Ambot og kinsa kaha nga presidente sa nasud nga dunay ideya kon unsaon pagpakunhod sa atong langyaw’ng utang.

* * *

Grabeha na man uy, reelectionist Mayor didto sa probinsya sa Cagayan, sakop sa Luzon, gipusil ug gipatay samtang nangampanya. Wa pa gyud madakpi ang nagpusil sa mayor.

Swerte kaayo ang mga kandidato dinhi sa Sugbo kay ang ilang panagribal sa posisyon nga gusto nilang angkonon, kuitob ra gyud sa baba ug wa sila maggamitay og armas.     

Aw, hinuon, dinhi sa Sugbo, kaila ra man gud ang mga nanagan pagka mayor ug sa ubang pwesto.

* * *

Daw dili ko makatoo nga si retired Court of Appeals (CA) Associate Justice Isaias Dicdican nalambigit sa pagpapatay sa usa ka abogado dinhi sa Sugbo kaniadtong 2020.

Nalambigit ang ngan ni Justice Dicdican kay ang kanhi PDEA regional director Edwin Layese nga nangontak og mga mopatay ni Atty. Joey Luis Wee, mitug-an man diay kay gusto nga mahimo siyang State Witness sa kaso.

Wa pa gyud hinuo’y kompletong detalyi nga gipagawas kabahin sa Extra-Judicial Confession ni Layese nga nagtumbok kang Justice Dicdican nga nalambigit pagpatay kang Wee.

Gipriso karon si Layese kay gitudlo man siya sa dinakpang gunman, si Fausto Edgar Peralta, nga maoy nagsugo aron patyon si Wee, ug iya gyud nga napatay didto sa Barangay Kasambagan niadtong 2020.