Kapin P5 milyong shabu nasakmit

CEBU, Philippines — Niabot sa kapin P5 milyones nga balor sa ilegal nga drugas ang nasakmit sa buy-bust operation nga gihimo Mabolo Police Station 4, Sawang Calero Police Station ug Labangon Police Station sa Cebu City.

Dul-an sa 800 grams nga gidudahang shabu ang nasakmit sa mga operatiba sa maong mga operasyon.

Niadtong Abril 22, Martes, nadakpan sa Mabolo Police Station 4 ang 39-anyos nga lalake nga napriso kaniadto sa kasong frustrated homicide sa Sitio Upper Carreta, Barangay Carreta, siyudad sa Sugbo.

Ang suspect mao si alyas Yoyo, 39 , nagpuyo sa Sitio Upper Carreta, Barangay Carreta ning siyudad.  Nasakmitan ang suspect og 200 grams nga shabu nga nagkantidad og P1.3 million.

Samtang ang 53-anyos nga lalake nga giingong naa sa listahan sa gun-for-hire nadakpan sa buy-bust operation sa Sawang Calero Police Station 6 sa Block 5, Barangay Sawang Calero.

Ang suspek mao si alyas Raymond, 53, molupyo sa Sitio Lawis, Barangay Pasil ning siyudad ug usa ka high value individual.

Nakompiskar sa otoridad ang 80.24 grams nga shabu nga nagkantidad og P545,632. Gawas niini, nasakmitan sab ang suspek og .38 kalibre rebolber nga dunay tulo ka buhing bala.

Ang pinakauwahing dakop sa kapulisan mao ang habal-habal driver nga nadakpan sa Labangon Police Station 10 sa Sitio Lutaw-Lutaw, Barangay Labangon niadtong Miyerkules sa gabii, Abril 23, 2025.

Ang suspek mao si alyas Rayray, 26, taga Sitio Oclahay, Barangay Labangon.  Nasakmitan kini og 510 grams nga nagkantidad og P3.4 million.

Nagkanayon si Police Lieutenant Colonel Maria Theresa Macatangay, Deputy City Director for Operations ug tigpamaba sa Cebu City Police Office nga sagad sa mga nadakpan bag-ong nakagawas prisuhan ug wala nagbag-o.

Ang dinakpan sa Sawang Calero Police ang ngalan niini nitumaw nga miyembro kini sa grupo sa gun-for-hire. 

Ang mga suspetsado gipasakaan og mga tukmang kaso.  IBM BANAT NEWS