SIMEX para sa mid-term elections gihimo sa kapolisan diha sa Cebu City Hall

CEBU, Philippines — Gipasiguro ni Cebu City Mayor Raymond Alvin Garcia sa kapulisan sa dakbayan sa Sugbo nga magmalinawon ang May 12, 2025 national ug local election sa siyudad.

Gusto ni Garcia nga mementinar ang kahapsay ug kalinaw sa dakbayan samtang nagkaduol na ang piniliay.

Ang mayor makigtagbo  og balik sa kapulisan sa mga mosunod nga adlaw aron tukion ang gihimo niining pagpangandam.

 Subay niini, gipangandaman sa Cebu City Police Office(CCPO), Cebu City Disaster Risk Reduction and Management Office(CCDRRMO) ug ubang law enforcement agencies ang mga worst case scenerios sa umaabot nga May 12, 2025 National ug Local Elections pinaagi sa gihimong simulation exercise sa social hall sa Cebu City Hall Building nga magsilbing canvassing area kagahapon sa buntag, Martes, Abril 22, 2025.

Girespondehan sa kapulisan ang alarma sa ika-upat nga andana sa legislative building sa Cebu City diin gi-takeover sa mga armadong lalake ang social hall ug gipang hostage ang mga tawo sa sulod nga gipangtionan og armas. Gi-negotiate sa kapulisan ang mga hostage takers pinaagi usab sa asawa sa usa sa mga nang-hostage aron mo-surrender.

Tagsa-tagsa ang pag-release sa mga biktima ug dihang nakagawas na sa lawak giatiman dayon sila sa emergency personnel sa CCDRRMO hantod nakombinsir sa mga pulis ang usa sa mga nang-hostage ug ni-surrender ug dali dayong giposasan.

Apan duna pay laing armadong tawo nga nagpagbilin sa sulod ug nagtion og armas sa mga nahibiling mga biktima.

Padayon ang negosasyon sa lead negotiator hantod nga ni-surrender ang nahibiling hostage taker.  Dunay naangol ug dunay namatay sa maong scenario.

Naka-standby ang mga sakop sa Special Weapons and Tactics (SWAT) sa gawas ug dihang nahawan ang lawak dali nilang gi-clear ang mga posibleng nahibilin sa dapit.

Ang maong sitwasyon, usa lang sa worst scenario nga posibleng mahitabo sa eleksiyon.

Sigon ni Police Lieutenant Colonel Maria Theresa Macatangay, Deputy City Director for Operations ug tigpamaba sa Cebu City Police Office,  on-track ang ilang preparasyon sa mga kalihukan sa 2025 midterm elections.

Lakip sab sa gipanegurado sa CCPO ang safety sa mga automated counting machines ug ang kaluwasan sa katawhan.

Una nang gipahigayon ang pagsuta sa communication signals sa mga dapit ilabi na sa kabukiran.

Human sa simulation exercise dunay gihimong critique aron mas mapalambo pa ang mga nakita nga angayang palambuon.--  IBM BANAT NEWS