Mayor Barcenas gikasohan sa Ombudsman Visayas

CEBU, Philippines — Gipasakaan og kaso sa buhatan sa Ombudsman Visayas si Carcar City mayor Mario Patricio “Patrick” Barcenas.

Ang nipasaka og kaso batok ni Barcenas mao sila si bise mayor Efren Quijano, konsehal Victor Ian Del Rosario, konsehal Lorena Mae Tabora, Laurence King Quijano, kanhi Sanguguniang Kabataan Federation President ug kanhi Association of Barangay Council (ABC) Anthony John Apura.

Gidawat sa buhatan sa Ombudsman Visayas ang reklamo niadtong Abril 14 ning tuiga.

Kasong adminstratiba ug criminal ang ilang gipasaka nga kaso ni Barcenas.

Ang pagpasaka og kaso nitumaw sa dihang gihisgutan ang proyekto nga Livestock Auction Market nga nahitabo na ang pagpropose, pag aprubar ug pagsumiter na sa pag bidding ug na award na ang proyekto sa winning bidder sa kanhi administrasyon.

Gani natigayon na ang kontrata niini human gihatagan ang kanhi mayor og pagtugot sa konseho.

Apan ang kanhi mayor wala na magpapili sa piniliay niadtong Mayo 2022 diin si Barcenas ang migawas nga mananaog.

Gikaingon nga si Barcenas nagtinguha sa revocation/repeal sa authority nga gihatag sa kanhi mayor sa rason nga sanitary and environmental concerns.

Niadtong Septiyembre 13, 2022, atol sa session sa konseho naabot si Barcenas ug nipagawas sa mga tawo nga dili konsehal lakip na ang SP secretary.

Si Barcenas ang giingong nipahibawo wa konseho nga siya gitanyagan og 10 porsyento sa P149,000,000 ka pesos nga proyekto isip SOP.

Matud pa nga wala na maghisgot sa revocation sa authority nga mosulod sa kontrata inay nipadayag sa unsa man ang benepisyo nga makuha sa siyudad kun matigayon ang proyekto nga Livestock Auction Market.

Pipila ka adlaw ang milabay, ang mga kihante ang nakadungog ug nakakita sa giingon nga tingog sa mayor diha sa social media nga nagviral.

“Ang iyang ihatag nato mao na, 10% sa whole 149 kay dili man 150, 10% ang iyang ikahatag nato. So mao nay akong gikuan ninyo. Ok ba mo ni-ana? Ako willing ko modawat ana kay ako man nang SOP,” tipik sa walo ka pahina nga gisang-at sa mga kihante.

Nihangyo sa buhatan sa Ombudsman Visayas ang mga kihante nga si mayor Barcenas ang pahamtamgan og preventive suspension aron di makabalda samtang magpadayon ang imbistigasyon. Samtang si Barcenas niingon nga wala pa makadawat sa kopya sa reklamo apan andam siya moatubang niini.

Asoy pa niya nga dili iyang tingog ang nadungog nga nagviral sa social media.  MEL BANAT NEWS