Magtiayon nga namatyan og tulo ka anak sa sunog nakadawat og ayuda

CEBU, Philippines — Napili sa Cebu City Fire Station ang magtiayong Siaboc nga nasunogan sa barangay Mambaling nga recipient sa ilang pangkabuhayan showcase.

Ang paghatag sa e-bike ug grocery items gipahigayon kagahapon sa buntag sa Parian Fire Station diin si Superintendent Reynaldo Enoc, City Fire Marshal sa Cebu City Fire Station ang nitunol ngadto sa magtiayon.

Sa nasayran naapil sa pagkasunog ang tulo ka mga anak sa magtiayon nga didto sulod sa ilang panimay.

Suma ni Senior Fire Officer 2 Wendell Villanueva, tigpamaba sa Cebu City Fire Station nga kabahin kini sa ilang outreach program diin kaniadto aduna na silay napatukoran og balay.

Nang apod-apod sab sila og goods sa Barangay Mambaling ug uban pang kalihukan nga hilom nilang gihimo.  "Karon naa tay ihatag nga e-bike, groceries ug uban pa alang sa magtiayong Siaboc. Kung kahinumduman taga Mambaling ni sila, sila maoy napilian nato nga recipient sa atoang gihatag nga mga butang, pangkabuhayan showcase gikan sa Cebu City Fire Station", sigon ni SFO2 Wendel Villanueva.

Suma pa ni Ynica Siaboc nga dako ang pasalamat nila sa Cebu City Fire Station sa hinabang nga gihatag ug ila usab kining ipaambit sa ilang mga silingan nga nasunogan usab.

Giangkon niya nga hangtod karon dili pa gyud sila okay apan naningkamot nga hingpit nga madawat ang nahitabo sa iyang mga anak. (BANAT NEWS)