OWWA nagpabiling alerto atol sa Semana Santa

CEBU, Philippines — Bisan sa solemne nga pag-obserba sa Semana Santa ang Overseas Workers Welfare Administration Regional Welfare Office-7 nagpabiling alerto nga nagtanyag sa round-the-clock nga tabang sa mga nauli nga Overseas Filipino Workers (OFWs) nga nangabot sa Cebu ug Bohol sa Abril 16 hangtud 20, 2025.

Aron masiguro ang kaluwasan ug kaayohan sa mga Pilipinong mopauli, ang OWWA-7 nihatag og airport assistance sa mga OFW nga nauli tungod sa maltreatment, contract violations, medical issues, overstaying, ug uban pa.

Gipadayag sa ahensiya nga niadtong Abril 16, 2025 duha ka OFW gikan sa Saudi Arabia ang niabot sa Sugbo human gipapauli tungod sa mga kaso sa maltreatment ug paglapas sa ilang employment contracts. Ang OWWA-7 nihatag og transportation support aron sila makaabot sa ilang tagsa-tagsa ka lungsod.

Sa ulahi nianang adlawa, ang ahensiya nitabang sa pag-abot sa usa ka medically repatriated OFW gikan sa Japan kinsa giubanan sa iyang usa ka miyembro sa pamilya ug daling gidala sa tambalanan.

Sa samang petsa, ang ahensiya nagkanayon nga ni-assist usab sila sa pagpauli sa patay’ng lawas sa usa ka OFW nga nagtrabaho isip electrical technician sa Saudi Arabia ug nitaliwan na ngadto sa gawas sa nasud.

Ang patay’ng lawas gitugyan ngadto sa kabanay ug gidala sa Dakbayan sa Toledo.

Sa laing bahin, niadtong Abril 17, 2025 niabot ang mas dakong grupo sa mga OFW gikan sa mga nasud lakip sa Saudi Arabia, United Arab Emirates, Qatar, ug Turkey.

Gibutyag sa state welfare agency sa mga OFW nga gipapauli sila tungod sa lain-laing mga concern sama sa medikal nga kondisyon, maltreatment, paglapas sa kontrata ug overstaying.

Ang uban gikuha sa ilang mga pamilya samtang ang uban gihatagan og transportation assistance aron luwas nga makaabot sa ilang mga pinuy-anan.

Samtang, niadtong Abril 20 usa ka distressed OFW ang niabot sa Bohol human mopauli tungod sa medical concerns ug contract violations ug gihatagan dayon siya og pagkaon ug transport assistance sa OWWA-7.

Pinaagi niining mga paningkamot, ang OWWA-7 nagkanayon nga sila magpabiling lig-on sa ilang pasalig sa padayong paghatag og tabang ug suporta sa mga nauli nga OFWs. (BANAT NEWS)