Pope Francis nitaliwan na   

CEBU, Philippines — Nitaliwan na ang ika-266 nga Santo Papa sa Simbahang Romano Katoliko nga si Pope Francis alas 7:35 sa buntag niadtong Lunes sa Pagkabanhaw, Abril 21, 2025, sa iyang pinuy-anan sa Casa Santa Marta, sa Vatican City, sa edad nga 88 anyos.

Ang makasubo nga balita opisyal nga gipahibalo ni Cardinal Kevin Farrell, Camerlengo sa Apostolic Chamber, nga gimantala sa Vatican News.

“Dearest brothers and sisters, with deep sorrow I must announce the death of our Holy Father Francis. At 7:35 this morning, the Bishop of Rome, Francis, returned to the house of the Father,” matud ni Farrell.

“His entire life was dedicated to the service of the Lord and of His Church. He taught us to live the values of the Gospel with fidelity, courage, and universal love, especially in favor of the poorest and most marginalized. With immense gratitude for his example as a true disciple of the Lord Jesus, we commend the soul of Pope Francis to the infinite merciful love of the One and Triune God," dugang niya.

Nahimo siyang Santo Papa kaniadtong Marso 13, 2013 isip hulip sa ni-resign nga si Pope Benedict XVI. Siya ang unang napili nga Santo Papa gikan sa Latin America ug ang unang Jesuit nga nakalingkod sa trono ni San Pedro.

Binunyagan siya sa pangalang Jorge Mario Bergoglio didto sa Buenos Aires, Argentina.

Si Pope Francis miserbisyo sa Simbahan sa mapahiubsanong kasingkasing, pagbati alang sa mga kabus ug marginalized, ug lig-on nga panaad sa kalooy, social justice, ug reporma sa pastoral. Atol sa iyang pagpamuno sa kapin usa ka bilyong miyembro sa Simbahang Romano Katoliko, nipatuman siya og mga mahinungdanong reporma nga nagbag-o sa pastoral nga pamaagi sa Simbahan sa dagkong mga isyu sama sa pakiglambigit sa mga batan-on, kaminyoon ug pamilya, LGBTQ+Community,   sistematikong pag-abuso sa kaparian ug dayalogo sa ubang relihiyon.

Sa miaging mga tuig, hinayhinay ang pagkaluya sa panglawas ni Pope Francis. Niagi siya og abdominal surgery niadtong 2021, ug nag-antos usab sa chronic knee pain ug sciatica, nga nagpugos kaniya sa paggamit og wheelchair.

Naospital siya Pebrero 2025 sa Gemelli Hospital tungod sa bronchitis nga nahimong double pneumonia, sumala sa taho sa CBS News ug The Guardian.

Matud pa sa mga doktor, acute respiratory distress ug early kidney complications ang iyang sakit maong lima ka semana siyang naospital ug nakagawas lang niadtong Marso 23.

Daghang nalipay sa dihang nipakita kini sa publiko atol sa Domingo sa Pagkabanhaw, Abril 20, luwan sa pope mobile sa St. Peter’s Square. Mao na diay kadto ang kataposang higayon nga makita siya sa mga magtutuo.

“The Archdiocese of Cebu joins the Universal Church in mourning the death of Pope Francis… His passing marks the end of a historic papacy that began on March 13, 2013, and was characterized by his deep compassion, pastoral zeal, and commitment to a “Church that goes forth,” matud pa sa pamahayag sa Archdiocese of Cebu sa Facebook post niini. (BANAT NEWS)