Nakahimamat sa Santo Papa

CEBU, Philippines — Samtang nagbangutan ang Simbahang Romano Katoliko sa tibuok kalibutan sa kalit nga pagtaliwan ni Pope Francis sa  Casa Santa Marta sa Vatican alas 7:35 sa buntag kagahapon, Lunes, Abril 21,2015, dunay mga  Sugbuanon nga personal nga nakapaduol kaniya ang nihinumdom sa ilang kasinatian.

Usa niini ang pangulo sa Commission on the Laity sa Archdiocese of Cebu Fe Mantuhac-Barino kinsa nasubo og maayo pagkahibalo nila sa balita.

Personal niya nga nahimamat si Pope Francis niadtong tuig 2016 dihang giila sa naulahi ang programang Surrender to God ni Barino, nga ang tumong mao ang pagtabang sa mga drug addicts. Matud pa niya mura siya og naglutaw sa panganod ug wala makasabot sa gibati.

Sa miaging tuig, 2024 didto gihapon sa Vatican gitudlo siyang miyembro sa Charismatic Council didto. Ug niadtong higayona gisiguro gyud niyang makahikap sa Santo Papa.

Laing mga Sugbuanon nga nakahimamat ang Santo Papa mao silang Yannie Mantuhac ug Yolly Rapana niadtong Nobiyembre 12, 2024 . Ang duha parehong nakahilak pagkasayod sa balita.

Matud ni Mantuhac, usa ka pinakanindot kato nga adlaw sa iyang kinabuhi bisag wala siya nakahikap sa Santo Papa nga niagi diha sa iyang atubangan.

Si Rapana sa iyang bahin nigawas sa iyang meeting ug giampo ang Santo Papa pagkasayod sa balita.

Kung mahinumduman nibisita sa Tacloban City sa Leyte si Pope Francis niadtong Enero 17, 2015 aron sa pakighimamat sa mga biktima sa Super Typhoon Yolanda nga niigo tuig 2013, samang tuig pagkatudlo kaniya nga Santo Papa.

Bisan walay hunong ang ulan ug kusog nga hangin nisungasong si Pope Francis sa pagpahigayon sa Santos nga Misa duol sa Tacloban City Airport.

Apan tungod sa dautang panahon, wa na madayun ang pagpakigdungan niya og kaon sa mga survivors.

"I am sad about this, truly saddened, because I had something prepared especially for you," pulong pa niya sa dihang nanamilit siya sa mga taga Leyte.

Human sa pagbiya niini nahugno ang scaffoldings sa stage diin gihimo ang Santos nga Misa ug usa ka babaye ang nakalas.

Ang mga tawong nitambong,apil kining nagsuwat sa balita, nilinya sugod ala- una sa kaadlawon aron makasulod sa dapit bisan sa kusog ang bunok sa uwan ug kusog nga hangin. (BANAT NEWS)