Upat ka sugarol sikop atol sa pagpangronda sa kapolisan

CEBU, Philippines — Upat ka gikatahong sugarol ang nadakpan atol sa pagpangronda sa kapolisan sa Toledo City Police Station sa tigbakayan diha sa Barangay Cambang-ug, Dakbayan sa Toledo niadtong Biyernes Santo.

Nabalhog sa prisohan sila si alyas “Eleuterio”, 58-anyos; alyas “Cresencio”, 68; alyas “Carl”, 19 ug alyas “Darwin”, 26, parehong nagpuyo sa Barangay Cambang-ug.

Ang kapolisan nakadawat og taho kabahin sa gipahigayong tigbakay diha sa dapit hinungdan nga gisusi nila kini.

Gikataho nga pag-abot sa mga polis nagtibawaag og panagan ang mga tawo diha sa tigbakayan apan nadakpan ang nahisgutang upat ka suspetsado.

Nasakmit sa mga polis ang duha ka manok igtatari, duha ka buwang ug P750 nga pusta.

Ang mga suspetsado gikatakdang pasakaan og tukmang kaso sa nahimo nilang kalapasan. — /BDB (BANAT NEWS)