Tulo ka drayber positibo sa random drug test  

CEBU, Philippines — Gipaubos sa random drug test ang mga bus, v-hire ug taxi driver sa Cebu South Bus ug North Bus Terminal kagahapon sa buntag.

Ang nagpasiugda sa random drug test mao ang Philippine Drug Enforcement Agency (PDEA)-7, Land Transportation Franchising and Regulatory Board (LTFRB)-7 ug Land Transportation Office (LTO)-7 diin gipahigayon kini diha sa mga terminal.

Matud ni PDEA-7 Regional Director Alex Tablate nga tumong sa maong random drug test nga magpabiling drug free ang mga drayber sa ilegal nga drugas.

Kini aron luwas ang mga pasahero ilabi na karon nga daghan ang manguli sa mga probinsiya pagtimaan sa Semana Santa.

Nasayran nga 55 ka bus, v-hire ug taxi driver sa CSBT ang gipaubos sa random drug test ug usa ka mini bus driver ang magpositibo.

Samtang sa NBT 54 ka drayber ang gipaubos sa random drug test ug duha ka bus driver ang nagpositibo.

 Ang lisensiya sa maong mga drayber gikompiska sa LTO-7 diin pahamtangan usab sila og multa.

Nasayran nga ang LTFRB-7 mopadala og summon sa ilang mga operator.

Sa laing bahin, nipahigayon og buy-bust operation ang PDEA Bohol Provincial Office uban ang Bohol Maritime Police, PNP Drug Enforcement Group ug Tagbilaran City Police Station sa P-5, Barangay San Isidro, Tagbilaran City, Bohol niadtong niaging adlaw.

Nadakpan sa mga operatiba ang high value Individual nga si alyas “Randy”, 43- anyos, candle supplier ug nagpuyo sa naasoy nga dapit.

Nasakmit sa operatiba ang tulo ka putos nga shabu nga nitimbang ngadto sa 55 gramo ug nikabat sa P374,000, buy-bust money ug usa ka motorsiklo.

Samtang sa Dakbayan sa Lapu-Lapu nadakpan sa kapolisan sa Lapu-Lapu City Police Office (LCPO) ang 47  ka tawo  gumikan sa lain-laing  kalapasan nga nahimo sa usa ka semana nilang pagpahigayon sa Simultaneous  Anti –Criminality Law  Enforcement Operation (SACLEO)  nga nagsugod niadtong Abril  7  hangtud sa Abril 13, 2025.

Si  Police  Lieutenant Colonel  Christian Torres, tigpamaba  sa LCPO  nagkanayon nga naglakip niini ang 21  ka anti-drug operation  diin niabot ngadto sa 35.28 gramo  nga shabu ang ilang nasakmit nga nikabat ngadto sa P239,904.

Nunot niini, 14 ka nagkalain-laing operasyon ang ilang gihapahigayon kinsa duha ka most wanted person regional level ang nasikopp gumikan sa mga kasong robbery ug murder, 12 ang nasikop nga other wanted person  kinsa  nag-atubang og kasong estafa, illegal gambling nga nalutsan usab og warrant of arrest  nga maoy gibasehan sa kapolisan sa pagsikop kanila. (BANAT NEWS)